પાલનપુર અને વડનગરની કોલેજોમાં MBBSનો અભ્યાસ કરતાં બે વિદ્યાર્થીઓએ જીવન ટૂંકાવ્યું, પરીક્ષાના ડરે અંતિમ પગલું ભર્યાનું અનુમાન!

 

વડનગરની GMERS મેડિકલ કોલેજમાં MBBSમાં અભ્યાસ કરતાં વિદ્યાર્થી અને પાલનપુર મોરિયા ખાતે બનાસ મેડિકલ કોલેજના MBBSના વિદ્યાર્થીઓએ આપઘાત કર્યો છે. વડનગરની GMERS મેડિકલ કોલેજના બીજા વર્ષમાં ભણતાં વિદ્યાર્થીએ મંગળવારે વહેલી સવારે મોત વહાલું કર્યું હતું. પરીક્ષા ચાલતી હોવાથી ડિપ્રેશનના કારણે વિદ્યાર્થીએ આ પગલું ભર્યું હોવાનો અંદાજો છે. GMERS મેડિકલ કોલેજમાં અભ્યાસ કરતો આ વિદ્યાર્થી અમરેલી જિલ્લાના રાજુલા તાલુકાના અગાડિયા-ધુળિયા ગામનો વતની હતો. 21 વર્ષીય ધર્મેશ ગિરીશભાઈ નકુમ અહીં હોસ્ટેલમાં રહીને અભ્યાસ કરતો હતો.

હાલ MBBSના વિદ્યાર્થીઓની પરીક્ષા ચાલી રહી છે ત્યારે ડિપ્રેશનના કારણે ધર્મેશે આપઘાત કર્યો હોવાનું અનુમાન છે. મંગળવારે વહેલી સવારે પોણા પાંચ વાગ્યે ધર્મેશે આપઘાતનો પ્રયાસ કરતાં તેને સારવાર માટે હોસ્પિટલ લઈ જવાયો હતો, જ્યાં સારવાર દરમિયાન તેનું મોત થયું હતું. આ બાબતે વડનગર પોલીસને જાણ કરાતાં એએસઆઈ ભરતસિંહ સહિત સ્ટાફે તપાસ શરૂ કરી હતી.

સૂત્રો પાસેથી પ્રાપ્ત માહિતી અનુસાર ધર્મેશના હાથ-પગ પર ચેકા મારેલા હતા. ઘટના બાદ વિદ્યાર્થીઓમાં અરેરાટી વ્યાપી છે. પોસ્ટમોર્ટમ પૂરું થયા બાદ પોલીસે મૃતદેહ પરિવારને સોંપ્યો હતો. ઘટના બની તે વખતે યુવક એકલો જ રૂમમાં અભ્યાસ કરતો હતો અને સામેના રૂમમાં અન્ય વિદ્યાર્થીઓ હતા તેમ સૂત્રોએ જણાવ્યું છે.

બીજી તરફ પાલનપુરથી પણ આપઘાતની ખબર સામે આવી છે. ગલબાભાઈ નાનાજીભાઈ પટેલ ચેરિટેબલ ટ્રસ્ટ સંચાલિત બનાસ મેડિકલ કોલેજમાં અભ્યાસ કરતો જતીન કીર્તિભાઈ દરજી (વતન- ભીલોડા, જિલ્લો અરવલ્લી) સોમવારે રાત્રે રૂમમાં અન્ય બે મિત્રો સાથે પરીક્ષાની તૈયારી કરતો હતો. દરમિયાન પાંચ મિનિટમાં આવું તેમ કહીને રૂમમાંથી નીકળ્યો હતો અને આપઘાત કરી લીધો હતો. ખાસ્સીવાર થઈ છતાં જતીન પાછો ના ફરતાં તેના રૂમ પાર્ટનર તેને શોધવા નીકળ્યા હતા. નીચે તે મૃત હાલતમાં મળી આવતાં વિદ્યાર્થીઓ ગભરાઈ ગયા હતા. તેમણે કોલેજના સ્ટાફ અને હોદ્દેદારોને જાણ કરી હતી.

ઘટનાની જાણ થતાં જ બનાસ મેડિકલ કોલેજના ચેરમેન પી.જે. ચૌધરી સહિત સ્ટાફ કોલેજ ખાતે દોડી આવ્યો હતો. વિદ્યાર્થીના મૃતદેહને પાલનપુર સિવિલમાં પોસ્ટમોર્ટમ માટે મોકલવામાં આવ્યો હતો. આ અંગે પોલીસે અકસ્માતે મોતનો ગુનો નોંધીને તપાસ શરૂ કરી હતી. મહત્વનું છે કે, બનાસ મેડિકલ કોલેજ ખાતે MBBSના વિદ્યાર્થીઓની પરીક્ષા ચાલી રહી છે. જતીનને મંગળવારે માઈક્રો બાયોલોજીનું પેપર હતું અને પછી એક પેપર બાકી હતું. વિદ્યાર્થીએ બે પેપર પહેલા જ અંતિમ પગલું ભર્યું હતું.

મહેસાણાના મનોચિકિત્સક ડૉ. પરીમલ પટેલે કહ્યું કે, ‘અમે અભ્યાસ કરતા હતા ત્યારે અમને પણ MBBSનો અભ્યાસ અઘરો લાગતો હતો અને તણાવ રહેતો હતો. પરંતુ પ્રયત્ન કરે તે જ સફળ થાય છે. જીવનમાં ક્યારેય નિષ્ફળતાનો ડર ના રાખવો જોઈએ. કોઈ મુશ્કેલી હોય કે કોઈ કારણોસર તણાવમાં આવો તો ખોટું પગલું ભરવાને બદલે મિત્રો અને પરિવારજનોની સાથે વાત કરો. ખુલ્લા મને વાત કરવાથી મન હળવું થાય છે અને હિંમત મળે છે. તમામ સમસ્યાઓનો રસ્તો નીકળે જ છે.’

Source link