પાટીદાર અગ્રણી નરેશ પટેલે રાજકારણમાં જોડાવવા અંગે ફરીથી સસ્પેન્સ ઉભું કર્યું!

 

રાજકોટ: ખોડલધામમાં ઉત્તર ગુજરાતના PAAS કન્વીનરો સાથે બેઠક પહેલા નરેશ પટેલે સૂચક નિવેદન આપીને ફરીવાર રાજકારણમાં જોડાવવા અંગે સસ્પેન્સ ઉભું કર્યું છે.ખોડલધામના પ્રમુખ નરેશ પટેલે મીડિયાને જણાવ્યા અનુસાર બહેનો અને મિત્રોની ખૂબ લાગણી છે કે, હું રાજકારણમાં જોડાઉ.. આ માટે મને થોડો સમય આપો. રાજકારણમાં જોડાઉ કે નહીં તે અંગે જાણ કરીશ અને બાદમાં કઈ પાર્ટીમાં જોડાવું છે તે નક્કી કરીશ.

ખોડલધામ પરિસરમાં રાજકારણની વાત નથી કરતા
નરેશ પટેલે મીડિયાને જણાવ્યું કે, બહેનો અને મિત્રોની લાગણી છે કે હું રાજકારણની અંદર આવું. મેં પહેલા પણ જણાવ્યું છે કે, દરેક સમાજને સાથે રાખીને ખોડલધામ કામ કરી રહ્યું હોય ત્યારે મારે દરેક સમાજની લાગણી લેવાની હોય છે. મને હજી થોડો સમય આપો. મીડિયાના માધ્યમથી હું બધાને જાણ કરીશ કે રાજકારણમાં આવવું છે કે નહીં? ખોડલધામ પરિસરમાં ક્યારે રાજકારણની વાત નથી કરતા. ખોડલધામ રાજકારણનું માધ્યમ નતી ફકત સંગઠનની જ વાત કરવામાં આવે છે.

ખોડલધામમાં બેઠકોનો દોર શરૂ
પ્રાપ્ત માહિતી અનુસાર ખોડલધામમાં PAAS કન્વીનર્સ અને નરેશ પટેલ વચ્ચે બેઠક યોજાઈ હતી. જેમાં પાસ કન્વીનર ગીતા પટેલ સહિત ઉત્તર ગુજરાતના 300 લોકો બેઠકમાં જોડાયા હતા. ગીતા પટેલે જણાવ્યું હતું કે, નરેશ પટેલ કોંગ્રેસમાં જોડાય તેવી અમારી ઈચ્છા છે. પરંતુ નરેશ પટેલે પોતાના નિવેદનમાં જણાવ્યું હતું કે, રાજકારણમાં જોડાવા માટે મને સમય આપો. રાજકારણમાં જોડાવાના નિર્ણય બાદ જ હું પાર્ટી નક્કી કરીશ.

Naresh Patel Khodaldham

બીજી તરફ ગીતા પટેલે જણાવ્યું કે, નરેશ પટેલ કોંગ્રેસમાં જોડાય તેવી અમારી ઈચ્છા છે, કારણ કે પાટીદાર આંદોલન વખતે સરકારે પાટીદાર સમાજ પર અત્યાચાર ગુજાર્યો હતો. તેમાં નરેશ પટેલ ન જોડાય તેવી ઈચ્છા છે. નરેશ પટેલ ગમે તે પક્ષમાં જાય મારી એમની સાથે શુભેચ્છા જોડાયેલી છે. સમાજની લડાઈ જ્યારે લડવી હોય તો સામા પક્ષે જ રહીને લડવી પડે. સરકારે પાટીદારો પર કેસ પાછા ખેંચવાની વાત કરી છે પણ હજુ સુધી કેસ પાછા ખેંચાયા નથી. તે અંગે પણ નરેશ પટેલ સાથેની બેઠકમાં ચર્ચા કરવામાં આવી.

કોંગ્રેસ, આપ અને ભાજપ આપી ચૂક્યું છે આમંત્રણ
ઉલ્લેખનીય છે કે, ગુજરાત વિધાનસભાની ચૂંટણી પહેલા પાટીદાર અગ્રણી નરેશ પટેલને પક્ષમાં જોડાવવા માટે કોંગ્રેસ, આમ આદમી પાર્ટી અને ભાજપ પણ આમંત્રણ આપી ચૂક્યું છે. કોંગ્રેસના કાર્યકારી પ્રમુખ હાર્દિક પટેલે પત્ર લખીને નરેશ પટેલને પાર્ટીમાં જોડાવવા કહ્યું હતું. જ્યારે AAP નેતા ઈસુદાન ગઢવીએ પંજાબમાં પાર્ટીની ભવ્ય જીત બાદ રાજકોટમાં યોજાયેલી તિરંગા યાત્રા દરમિયાન નરેશ પટેલ પાર્ટીમાં જોડાય તેવી આશા વ્યક્ત કરી હતી. તો ભાજપ દ્વારા પણ નરેશ પટેલને પાર્ટીમાં જોડાવવા આમંત્રણ આપવામાં આવ્યું. પૂર્વ સીએમ રૂપાણીએ મીડિયાને જણાવ્યું હતું કે, નરેશ પટેલ ભાજપ સાથે રહેશે અને પીએમ મોદી અને અમિતશાહના નેતૃત્વમાં આગળ વધશે. બીજી તરફ ગુજરાત ભાજપ પ્રદેશ પ્રમુખ સીઆર પાટીલે પણ કહ્યું કે, નરેશ પટેલ વર્ષોથી ભાજપના શુભેચ્છક રહ્યા છે.

Source link