પાટીદાર અગ્રણી નરેશ પટેલ AAPમાં જોડાઈ શકે, રાજ્યસભા સાંસદ બને તેવી શક્યતા!

 

અમદાવાદ: પાટીદાર અગ્રણી નરેશ પટેલના રાજકારણમાં આવવાના લઈને હાલ અનેક ચર્ચાઓ ચાલી રહી છે. કોંગ્રેસમાં જોડાવાની શક્યતા વચ્ચે હવે એવું કહેવામાં આવી રહ્યું છે કે, આમ આદમી પાર્ટી (AAP) નરેશ પટેલને રાજ્યસભાના સાસંદ બનાવી શકે છે. કારણ કે, માર્ચના અંતમાં પંજાબમાં રાજ્યસભાની 5 સીટ માટે ચૂંટણી યોજાવાની છે. આ ચૂંટણીમાં આપને 4 બેઠક મળવાની શક્યતા હોવાથી આવા સંજોગોમાં ગુજરાત વિધાનસભાની ચૂંટણીને ધ્યાનમાં રાખીને AAP નરેશ પટેલને રાજ્યસભા લડવાની ઓફર કરી શકે તેવું સૂત્રો પાસેથી જાણવા મળ્યું છે.

નરેશ પટેલને રાજ્યસભામાં આપવામાં આવી શકે સ્થાન
આ અંગે ગુજરાત આપના પ્રદેશ પ્રમુખ ગોપાલ ઈટાલિયાએ ટીવી ચેનલને જણાવ્યા અનુસાર તેઓ મારી વાત સાંભળતા હોય તો હું તેમને રિકવેસ્ટ કરીશ કે, તેઓ પાર્ટીમાં જોડાય. કારણ કે, ગુજરાતમાં સારામાં સારો પક્ષ આમ આદમી પાર્ટી છે, જેથી અમે એવું ઈચ્છીએ છે કે, નરેશભાઈ આપમાં જોડાય. ગોપાલ ઈટાલિયાએ વધુમાં જણાવ્યું કે, જો નરેશ પટેલ આપમાં જોડાય તો ગુજરાતની પ્રજાનો ભરોસો વધુ મજબૂત બને.

માર્ચ એન્ડ સુધી રાજકીય પ્રવેશ અંગે કરી શકે છે નિર્ણય
ઉલ્લેખનીય છે કે, મંગળવારે નરેશ પટેલે પાર્ટીમાં જોડાવા અંગે પ્રતિક્રિયા આપી હતી, તેમણે મીડિયાને જણાવ્યા અનુસાર જે પણ રાજકીય પક્ષોએ તેમને આમંત્રણ આપ્યું છે તેનો તેઓ આભાર માને છે, પરંતુ હાલ તેમની રાજકારણમાં જોડાવાની કોઈ ગણતરી નથી. તેમણે એમ પણ કહ્યું હતું કે, જો સમાજના લોકો તેમને આ અંગે કહેશે તો તેઓ ચોક્કસ રાજકારણમાં જોડાશે. જોકે, પોતે કઈ પાર્ટીમાં ક્યારે જોડાશે તે અંગે યોગ્ય સમયે જાણ કરશે. માર્ચના અંત સુધીમાં પોતે રાજકારણમાં જવું કે નહીં તે અંગે કોઈ સ્પષ્ટતા કરશે તેવું કહેતા નરેશ પટેલે કહ્યું હતું કે દરેક સમાજનું કલ્યાણ થાય અને પોતાનો ક્યાંક ઉપયોગ થાય તો પોતાને ચોક્કસ રાજકારણમાં જવું જોઈએ.’

નરેશ પટેલની દિલ્હી મુલાકાત બાદ ચર્ચાએ જોર પકડ્યું
મહત્વનું છે કે, તાજેતરમાં નરેશ પટેલની દિલ્હીની ઉડતી મુલાકાત બાદ ગુજરાતના રાજકારણમાં ગરમાવો આવ્યો હતો. દિલ્હીમાં તેઓ અનેક નેતાઓને મળ્યાની ચર્ચા પણ થઈ ત્યારે ખુદ નરેશ પટેલે આ અંગે સ્પષ્ટતા કરતા મીડિયાને જણાવ્યું હતું કે, ઔદ્યોગિક મેળો હોવાથી દિલ્હી જવાનું થયું. આ દરમિયાન કોઈ રાજકીય બેઠક થઈ નથી.

Source link