પાકિસ્તાનના પીએમ ઈમરાન ખાનની ખુરશી અને લોટાનું શું છે કનેક્શન? ઈસ્લામાબાદમાં હિંસક પ્રદર્શન!

 

ઈસ્લામાબાદ: પાકિસ્તાનના વડાપ્રધાન ઈમરાન ખાન (Imran Khan)નું સંકટ વધી ગયું છે. તેમને સત્તા પરથી ઉતારવા માટે વિપક્ષની સાથે-સાથે તેમની પાર્ટીના ઘણા સાંસદ એક થઈ ગયા છે. ઈમરાન ખાનના પક્ષ પીટીઆઈના જે 24 જેટલા સાંસદ તેમની વિરુદ્ધ છે તેમણે હાલમાં સરકારના ક્રોધથી બચવા માટે સિંધ હાઉસમાં ડેરો જમાવ્યો છે. આ સભ્યોની સામે સિંધ હાઉસની બહાર ઈસ્લામાબાદમાં પાર્ટીના કાર્યકર્તાઓએ વિરોધ દર્શાવવા માટે લોટા લઈને પ્રદર્શન કર્યું. એક સમયે આ પ્રદર્શન હિંસક પણ થઈ ગયું.

આ કાર્યકર્તાઓનો વિરોધ શરૂઆતમાં શાંતિપૂર્વક શરૂ થયો, પરંતુ થોડા સમયમાં જ તેણે હિંસક રૂપ લઈ લીધું. કાર્યકર્તાઓએ ગેટ તોડી નાખ્યો અને સિંધ હાઉસની અંદર ઘૂસી ગયા. ત્યાં મોટા પ્રમાણમાં પોલીસ હાજર હોવા છતાં આ ઘટના બની. એમએનએ અતાઉલ્લાહ નિયાજી સહિત પીટીઆઈ કાર્યકર્તાઓએ પ્રદર્શનમાં ભાગ લીધો. કાર્યકર્તાઓએ પીટીઆઈ એમએનએના વિરોધમાં અને પીએમ ઈમરાન ખાનના સમર્થનમાં નારા લગાવ્યા. કાર્યકર્તાઓએ લોટાને પગેથી રગડ્યા. પાકિસ્તાનના રાજકારણમાં લોટા એક અપમાનજનક શબ્દ છે, જેનો ઉપયોગ વિશ્વાસઘાત માટે કરવામાં આવે છે.

આ દરમિયાન ઈસ્લામાબાદમાં પીટીઆઈ અને ઈન્સાફ સ્ટૂડન્ટ ફેડરેશન (આઈએસએફ)ના કાર્યકર્તાઓએ પણ જિલ્લા પરિષદ ચોક પર એનએમએ રાજા રિયાઝના વિરોધમાં પ્રદર્શન કર્યું. પ્રદર્શનકારીઓએ રિયાઝને પાર્ટીમાંથી બહાર કરવાની માંગ કરી. આ વિરોધ પછી રિયાઝના ઘરની બહાર સુરક્ષા વધારી દેવાઈ છે. ભારે ભીડે રસ્તો જામ કરી એમએનએ સામે નારા લગાવ્યા. એવો જ વિરોધ પેશાવરમાં એમએનએ નૂર આલમ ખાન સામે પણ થયો.

હિંસક પ્રદર્શન વચ્ચે સ્થિતિ હવે નિયંત્રણમાં જણાવાઈ રહી છે. ઈસ્લામાબાદ પોલીસે હિંસક વિરોધમાં સામેલ બધા લોકોની ધરપકડ કરવાનો નિર્દેશ આપ્યો છે, જેમાં બે સાંસદ અતાઉલ્લાહ નિયાઝી અને ફહીમ ખાન સામેલ છે.

પાકિસ્તાનમાં ઈમરાન ખાન સરકાર દરેક મોરચે નિષ્ફળ રહી હોવાનો વિપક્ષો આક્ષેપ લગાવી રહ્યા છે. ઈમરાન ખાનની સરકારના કાર્યકાળ દરમિયાન પાકિસ્તાન પહેલા કરતા વધુ કંગાળ બન્યું છે અને તેના પર દેવું સતત વધી રહ્યું છે. આર્થિક અને વિદેશ નીતિની બાબતમાં પણ પાકિસ્તાનને સતત પછડાટ મળી રહી છે.

Source link