પરીક્ષા ચાલુ થયાના અડધા કલાકમાં જ ધોરણ-10નું પેપર વાયરલ થયાનો દાવો, 4 પકડાયા!

 

વડોદરા: ગુજરાત શિક્ષણ બોર્ડ દ્વારા લેવામાં આવેલી ધોરણ-10ની પરીક્ષામાં શનિવારે છેલ્લું પેપર હતું. જેમાં દ્વિતિય ભાષા હિન્દીનું પેપર પરીક્ષા શરૂ થયાના અડધા કલાકમાં જ લીક થયાનો ચોંકાવનારો ખુલાસો થયો છે. મીડિયા રિપોર્ટ અનુસાર આ પેપર દાહોદના સંજેલીમાંથી વાયરલ થયું હતું. સમગ્ર મામલે પોલીસ દ્વારા 5 આરોપીની અટકાયત કરીને પૂછપરછ હાથ કરવામાં આવી છે. ઉલ્લેખનીય છે કે, પેપરમાં પૂછાયેલા સવાલના હાથથી લખાયેલા જવાબ સોશિયલ મીડિયામાં ફરતા થતાં મામલો સામે આવ્યો હતો.

મહીસાગર સુધી પહોંચ્યું કનેક્શન
પ્રાપ્ત માહિતી અનુસાર પેપર લીક થવાના મુદ્દે મહીસાગર જિલ્લો ફરી એકવાર વિવાદમાં આવ્યો છે. સંતરામપુર તાલુકાના કાળીબેલ ગામના શૈલેષ પટેલની ધરપકડ કરવામાં આવી છે. દાહોદ LCB દ્વારા શૈલેષ પટેલને ઝડપી વધુ પૂછપરછ હાથ ધરવામાં આવી છે. જેથી આ કેસમાં વધુ ચોંકાવનારા ખુલાસાઓ થાય તેવી શક્યતા છે.

પ્રાપ્ત અહેવાલો અનુસાર 9 એપ્રિલના રોજ ધોરણ 10ની હિન્દીની પરીક્ષા હતી. જેમાં પરીક્ષા પૂર્ણ થવાના અડધા કલાક પહેલા હિન્દીનુ પેપર આન્સર કી સાથે સોશિયલ મીડિયામાં વાયરલ થતાં ખળભળાટ મચી ગયો હતો. જે ફેસબુક એકાઉન્ટ પર પેપર વાયરલ થયુ હતુ તે સંજેલીના ચમારીયાના હોળી ફળિયામાં રહેતાં ધનશ્યામ જગદીશભાઇ ચારેલનુ હોવાનું પોલીસ તપાસમાં ખૂલ્યું છે. નાની સંજેલીમાં રહેતાં સુરેશ ડામોરે આ પેપર ઘનશ્યામને વોટ્સએપ મારફતે જવાબો સાથે મોકલ્યુ હોવાનું જાણવા મળ્યું છે.

પેપર શરૂ થયાના અડધા કલાકમાં જ લીક થયું પેપર!
સુરેશ ડામોરની ઉલટ તપાસ કરતાં તેનો પુત્ર ચિરાગ ધોરણ 10ની પરીક્ષા આપી રહ્યો હોવાનું સામે આવ્યું છે. હિન્દી વિષયના પેપર માટે મુળ મહિસાગર જિલ્લાના કાળીબેલના રહેવાસી અને નાની સંજેલીમાં વૃંદાવન આશ્રમશાળાના પ્રાથમિક વિભાગના શિક્ષક શૈલેશ મોતીભાઇ પટેલે પોતાના ભુતપૂર્વ વિદ્યાર્થી અમીત ભારતાભાઇ તાવિયાડનો સંપર્ક કરાવી આપ્યો હતો. જે અમિત તાવિયાડે હિન્દીનુ પેપર સવારે 10:47 કલાકે સુરેશ ડામોરને મોકલી આપ્યું હતું.

આ પેપરની પ્રિન્ટ કાઢવા માટે સુરેશે તેના મિત્ર જયેશ ડામોરને ફોન કરતા તેને ઘરે બોલાવીને આ પેપરની પ્રિન્ટ કાઢવા માટે તેના સંબંધી ઘનશ્યામ જગદીશ ચારેલને મોકલી આપ્યું હતું. ત્યાર બાદ આ પેપર વાયરલ થયુ હોવાનો ઘટસ્ફોટ થયો છે. જો કે, અમિત પાસે આ પેપર ક્યાંથી આવ્યું તે પાછળનું કારણ જાણવા પોલીસે પાંચેય આરોપી સામે ફરિયાદ નોંધીને તપાસ શરૂ કરી છે.

Source link