પત્ની, બે બાળકો અને દાદીસાસુની હત્યા કર્યા બાદ વિનોદ બીજા બે મર્ડર કોના કરવાનો હતો?

 

અમદાવાદ: ચાર-ચાર હત્યા કરનારા વિનોદ ગાયકવાડનો મૂળ પ્લાન આમ તો છ મર્ડર કરવાનો હતો, પરંતુ પત્ની, બે બાળકો અને દાદી સાસુને છરાના ઉપરાછાપરી ઘા મારી મોતને ઘાટ ઉતાર્યા બાદ તેને પોતાના કૃત્યનો અહેસાસ થયો હતો. અમદાવાદ ક્રાઈમ બ્રાંચને પૂછપરછ દરમિયાન વિનોદે જણાવ્યું હતું કે ચાર મર્ડર કર્યા બાદ તે ઘરે આવેલી પોતાની સાસુને પણ પતાવી દેવા માગતો હતો, તેના ગળા પણ તેણે છરો પણ ફેરવ્યો હતો પરંતુ પાંચમું મર્ડર કરતા તેનો જીવ નહોતો ચાલ્યો. આખરે આખી રાત સાસુને ઘરે બેસાડી રાખ્યા બાદ વિનોદ સવારે તેને મૂકી આવ્યો હતો. તેણે સાસુને પોલીસ આગળ મોં ના ખોલવાની પણ ધમકી આપી હતી, અને સાથે એમ પણ જણાવ્યું હતું કે ગળા પર થયેલી ઈજા અંગે કોઈ પૂછે તો પડી ગઈ હતી તેમ કહી દેજે.

વિનોદે આ સમગ્ર હત્યાકાંડ પત્નીનું પરપુરુષ સાથે અફેર ચાલતું હોવાથી આચર્યો હતો. ચાર મર્ડર કર્યા બાદ તે પત્નીના પ્રેમીને પણ મારી નાખવા માગતો હતો. પોલીસના જણાવ્યા અનુસાર, ગુનો આચર્યા બાદ વિનોદ એક્સપ્રેસ હાઈવે પર આવ્યો હતો, અને બસમાં બેસી સુરત જતો રહ્યો હતો. ત્યાં તે બે દિવસ જેવું રોકાયો હતો અને ત્યારબાદ ફરી અમદાવાદ આવ્યો હતો. જે દિવસે પોલીસને ચારેય મૃતકોની લાશ મળી આવી તે દિવસ પણ વિનોદ અમદાવાદમાં જ હતો. તેનો મૂળ પ્લાન પત્નીનું મંગળસૂત્ર વેચીને હથિયાર ખરીદી તેના પ્રેમીની હત્યા કરી નાખવાનો હતો. જોકે, તેને ડર લાગ્યો હતો કે તે ચાર હત્યા પહેલાથી જ કરી ચૂક્યો છે તેવામાં પોલીસ તેને શોધતી જ હશે, અને જો પોતે અમદાવાદમાં રહેશે તો પકડાઈ જશે.

સુરતથી અમદાવાદ પરત ફરેલો વિનોદ ઈન્દોર તરફ ભાગી ગયો હતો. જોકે, ત્યાં પણ તે થોડો સમય રોકાયા બાદ બસમાં બેસીને અમદાવાદ આવવા નીકળ્યો હતો. પોલીસથી ભાગી રહેલા વિનોદ પાસે તેની પત્ની અને બે બાળકોના ફોન પણ હતા, અને તે અલગ-અલગ સમયે એક જ ફોન ચાલુ રાખતો હતો. પોલીસે કુલ દસ જેટલા નંબરો ટ્રેસ કરવા મૂક્યા હતા અને તેના આધારે વિનોદનું લોકેશન મળી રહ્યું હતું. તે ઈન્દોરથી પરત ફરી રહ્યો હતો ત્યારે વારંવાર તેનું લોકેશન બદલાતું રહ્યું હતું. આખરે પોલીસે એક ચોક્કસ સ્થળ પર તમામ વાહનો રોકીને તપાસ કરી હતી, જે દરમિયાન એક બસમાંથી તે પકડાઈ ગયો હતો.

પોલીસના જણાવ્યા અનુસાર, વિનોદનો દીકરો પોતાની માતાને તેના પ્રેમી સાથે જોઈ ગયો હતો, અને આ અંગે તેણે વિનોદને બધી વાત કરી હતી. ત્યારથી જ વિનોદ પત્ની અને તેના પ્રેમીને સબક શીખવવા માગતો હતો, પરંતુ પત્નીનો પ્રેમી વગદાર માણસ હોવાના કારણે તે તેનું કંઈ બગાડી નહોતો શક્યો. જેથી તેણે પત્નીને જ ખતમ કરી દેવાનું નક્કી કર્યું હતું. પોલીસનું એમ પણ કહેવું છે કે, અગાઉ ચાલીમાં રહેતો વિનોદ પત્નીને પતાવી દેવાના પ્લાન સાથે જ ભાડાંના મોટા ઘરમાં રહેવા આવ્યો હતો. નવા ઘરમાં આ પરિવાર માંડ એક મહિનાથી જ રહેતું હતું.

પ્રારંભિક પૂછપરછમાં વિનોદે પોલીસને જણાવ્યું હતું કે તેણે પત્નીનું મર્ડર કરવા માટે દીકરાને શ્રીખંડ જ્યારે દીકરીને પડીકી લેવા માટે બહાર મોકલી દીધા હતા. ત્યારબાદ તેણે પત્નીને ચાલ તને સરપ્રાઈઝ આપું તેમ કહીને તેની આંખ પર પાટો બાંધી દીધો હતો, અને પછી તેને છરાના ઉપરાછાપરી ઘા મારીને ત્યાં જ પતાવી દીધી હતી. વિનોદે પત્નીની હત્યા કરી તેના ગણતરીના સમયમાં જ તેનો દીકરો આવી પહોંચ્યો હતો. પત્નીનાં મર્ડર બાદ પોતે જેલમાં જશે તો બાળકોનું શું થશે તેવું વિચારી વિનોદે દીકરાને પણ મારી નાખ્યો હતો, અને ત્યારપછી આવેલી દીકરીને પણ મોતના હવાલે કરી દીધી હતી. ત્યારબાદ તેણે દાદી સાસુનું પણ મર્ડર કર્યું હતું. પોલીસના જણાવ્યા અનુસાર, દાદીસાસુ પત્નીને ચઢાવતી હોવાને કારણે દાઝ રાખી વિનોદે તેમની પણ હત્યા કરી નાખી હતી.

પોલીસ કસ્ટડીમાં રહેલા વિનોદના ચહેરા પર ચાર હત્યા કરવાનો કોઈ રંજ નહોતો

Source link