નોઈડાના તોડી પડાયેલા 32 માળના ટ્વીન ટાવરની આસપાસની બિલ્ડિંગમાં તિરાડો દેખાઈ!

 

નોઈડા: દિલ્હી નજીકના નોઈડામાં ગેરકાયદે રીતે ઉભા કરી દેવાયેલા 32 માળના ટ્વીન ટાવરને બ્લાસ્ટ કરી તોડી પડાયા બાદ હવે આસપાસની બિલ્ડિંગ્સમાં તીરાડો દેખાતા લોકો ચિંતામાં મુકાયા છે. પ્રાપ્ત વિગતો અનુસાર, સુપરટેક ટ્વીન ટાવરની બાજુમાં આવેલા એમર્લેન્ડ કોર્ટ અને એટીએસ ગ્રીન્સ વિલેજના ચાર ફ્લેટ્સમાં કોલમમાં હેરલાઈન ક્રેક દેખાઈ છે. ગયા રવિવારે અહીં નિયંત્રિત વિસ્ફોટ દ્વારા 32 માળના ટ્વીન ટાવરને જમીનદોસ્ત કરાયા હતા.

3700 કિલો વિસ્ફોટકોથી ટ્વીન ટાવર્સ તોડી પડાયા ત્યારે આસપાસના બિલ્ડિંગને પણ ખાલી કરાવી દેવાયા હતા. જોકે, બ્લાસ્ટ બાદ ધૂળ અંદાજ કરતા પહેલા જ બેસી જતાં લોકો પાંચેક કલાકમાં જ ફરી આવી ગયા હતા. અગાઉ બે દિવસ સુધી ટાવરની આસપાસ રહેતા લોકોને ઘરે ના આવવા કહેવાયું હતું. જોકે, હવે આ ઘટનાના ચારેક દિવસ બાદ બ્લાસ્ટ સાઈટની આસપાસના ફ્લેટમાં તીરાડો દેખાતા એક નવો જ સવાલ ઉભો થયો છે.

બ્લાસ્ટ કરાયો તેની થોડીવારમાં જ એક્સપર્ટ્સ દ્વારા આજુબાજુની બિલ્ડિંગ્સનો સર્વે કરાયો હતો. જેમાં તેમને કોઈ નુક્સાન ના થયું હોવાનું કહેવાયું હતું. જોકે, હવે બ્લાસ્ટ કરનારી કંપની એડિફિસ એન્જિનિયરિંગે કેરળ સ્થિત એક કંપનીની મદદથી એમરલેન્ડ કોર્ટ અને એટીએસ ગ્રીન્સ વિલેજમાં ફરી સર્વે શરુ કરાયો છે, જેની કામગીરી બુધવારથી શરુ કરી દેવાઈ હતી. બીજી તરફ, એમરલેન્ડ કોર્ટ દ્વારા હાયર કરાયેલી દિલ્હી સ્થિત એક એન્જિનિયરિંગ કંપનીએ સોસાયટીના બેસમેન્ટમાં 10-12 કોલમ્સમાં ક્રેક પડી હોવાનો રિપોર્ટ આપતા બેસમેન્ટ કોમ્પ્લેક્સના કોલમ્સનું રેટ્રોફિટિંગ કરાવવા સલાહ આપી છે. આ ઉપરાંત સ્ટ્રક્ચરને કેટલું નુક્સાન થયું છે તેનો યોગ્ય અંદાજ મેળવવા કેટલાક વધુ ટેસ્ટ કરાવવા માટે પણ જણાવાયું છે.

દિલ્હી સ્થિત ડીએન્ડઆર કન્સલ્ટન્ટના ડિરેક્ટર રેવતી રમણ સિંહના જણાવ્યા અનુસાર, આ બિલ્ડિંગ્સનો રિબાઉન્ડ હેમર ટેસ્ટ અને કોર કટિંગ ટેસ્ટ કરાવવા માટે સોસાયટીના મેમ્બર્સને કહેવામાં આવ્યું છે. જ્યારે એટીએસ ગ્રીન્સ વિલેજના ટાવર 5, 6એ, 7 અને 20ના ચાર ફ્લેટ્સમાં દીવાલ અને પિલરમાં ક્રેક જોવા મળી છે, જેમાંથી 6એ તોડી પડાયેલા ટ્વીન ટાવર્સની સૌથી નજીક હતો.

ગ્રીન્સ વિલેજ RWAના પ્રમુખ અતુલ ચતુર્વેદીના જણાવ્યા અનુસાર, સોસાયટીના 40 મેમ્બર્સે બ્લાસ્ટથી બારી અને કાચમાં તીરાડો પડી હોવાનું જણાવ્યું છે, જ્યારે ચાર ફ્લેટમાં તીરાડો પડી છે. જે ત્રણ ટાવર્સમાં ક્રેક દેખાઈ છે તે બ્લાસ્ટ સાઈટથી ખાસ નજીક નહોતા, જેથી તેમને થયેલા ડેમેજનું આકલન કરવા વિગતે તપાસ કરવી પડશે. બીજી તરફ, જેના ફ્લેટમાં તીરાડ પડી છે તેવા એક મેમ્બરે જણાવ્યું હતું કે તેણે આ અંગે સોસાયટીને જાણ કરી છે.

સુપરટેક ટાવરને તોડી પાડવાની ઘટનામાં આસપાસના ટાવર્સને જો કોઈ નુક્સાન થાય તો તેની ભરપાઈ કરવાની જવાબદારી સુપરટેકના બિલ્ડર્સની રહેશે. તેની નજીક આવેલા એમરેલન્ડ કોર્ટ અને એટીએસ ગ્રીન્સ વિલેજને કોઈ ડેમેજ થયું છે કે નહીં તે ચકાસવા માટેના તમામ રિપોર્ટ પણ સુપરટેકે કરાવીને તેને કોર્ટ દ્વારા નિયુક્ત કરાયેલા અધિકારી સમક્ષ જમા કરાવવાના રહેશે. ઉલ્લેખનીય છે કે, ટ્વીન ટાવરને તોડી પાડવાનું કામ લેનારી કંપની Edifice દ્વારા આસપાસની બિલ્ડિંગ્સનો 100 કરોડ રુપિયાનો ઈન્શ્યોરન્સ લેવામાં આવ્યો હતો.

Source link