નાના બાળકોને સ્ટોરેજ દવાઓ આપવાનું ટાળો, પીડિયાટ્રિશિયન પાસેથી જાણો મેડિસિનને લગતી માહિતી

Cough Syrup can cause Side Effects: નાના બાળકોને થતી સામાન્ય બીમારીનો ઘરે જ ઇલાજ કરવા માટે મોટાંભાગે પેરેન્ટ્સ કેટલીક દવાઓ અને સિરપ હાથવગા રાખતા હોય છે. પરંતુ અનેક રિપોર્ટ્સ અને મેડિકલ સ્ટડીઝમાં એ સાબિત થયું છે કે, કેટલીક દવાઓ ફ્લૂ જેવી બીમારીઓનો ઇલાજ નથી કરી શકતી. આ સિવાય તેઓને ખાંસી કે શરદીની આડેધડ દવાઓ આપવાથી બાળકના જીવને જોખમ ઉભું થઇ શકે છે.

ડોક્ટર્સ દ્વારા બે વર્ષ કે તેનાથી નાના બાળકોને તબીબી સલાહ વગર કફ અને શરદીની દવાઓ નહીં આપવાની તાકીદ કરવામાં આવે છે. કેટલાંક મેન્યુફેક્ચરર્સે આ નિયમોનું પાલન કરી નાના બાળકો માટે આ પ્રકારની દવાઓની બનાવટ અને વેચાણ પણ બંધ કરી દીધું છે. કફ અને શરદી માટેની કેટલીક દવાઓ બાળકના અવયવોને લાંબા ગાળે ભયંકર નુકસાન પહોંચાડી શકે છે.

જે બાળકોને રાત્રીના સમયે સૌથી વધારે શરદી અને ખાંસીની તકલીફ રહેતી હોય તેવા પેરેન્ટ્સ બાળકને રાહત મળે તે માટેના તમામ પ્રયત્નો કરવા માટે તૈયાર દાખવતા હોય છે. જેથી બાળક શાંતિથી સૂઇ શકે, તેથી જ આ પ્રકારની સામાન્ય શરદી ખાંસીમાં પણ કેવા પ્રકારની દવાઓ આપવી જોઇએ તેની સમજ ખૂબ જ જરૂરી છે. અહીં, નોઇડાની મધરહૂડ હોસ્પિટલ (Motherhood Hospital, Noida) ના પીડિયાટ્રિશિયન ડો. અમિત ગુપ્તા (Dr Amit Gupta, Senior Consultant Paediatrician & Neonatologist) બાળકોને કેવી દવાઓ આપવી જોઇએ અને શું સાવધાની રાખવી જોઇએ તે અંગે માહિતી આપી રહ્યા છે.

(તસવીરોઃ પિક્સાબે.કોમ, ફ્રિપિક.કોમ)

​મેડિસિન વિશે પુરતી માહિતી

બાળકને ખાંસી શરદીમાં દવાઓ આપવી ક્યારેય મુશ્કેલીઓ ઉભી કરી શકે છે. ખાસ કરીને જ્યારે બે વર્ષ કે તેનાથી નાના બાળકોને દવાનો કેટલો ડોઝ આપવો જોઇએ તેની અપુરતી માહિતી ઘણીવાર ફાયદાના બદલે નુકસાન કરે છે. તેથી જ દવાઓની ખરીદી પહેલાં અને બાદમાં તમારાં ડોક્ટરને સંપર્ક કરો. ઘરે જ બાળકની દરકાર રાખવાથી તે ઝડપથી રિકવર થતા હોય છે, જેમ કે બાળકને તાવ આવ્યો હોય તો તેને પુરતો આરામ કરવા દો અને લિક્વિડ ખોરાક આપો.

​વેપોરાઇઝરનો ઉપયોગ

જો બાળકનું નાક સતત વહેતું હોય તો સેલિન (saltwater)ના બેથી ત્રણ ટીપાં નાકમાં નાખો. હવામાનમાં સતત વેપોરાઇઝરની સ્મેલ રહે તે માટે રૂમનું ટેમ્પરેચર સેટ કરતી વખતે વેપોરાઇઝરનો ઉપયોગ કરી શકાય છે. જો કે, બીજાં દિવસે રૂમ ક્લીન કરવાનું ભૂલશો નહીં કારણ કે, ભેજવાળા વાતાવરણમાં બેક્ટેરિયા સૌથી વધારે રહે છે.

​બાળકને મેડિસિન આપતી વખતે ધ્યાન રાખો

  • દવાનું નામ અને તેનો ઉપયોગ કે કામગીરી વિશે જાણી લો
  • કેટલી માત્રા, કેટલા સમયાંતરે અને કેટલાં સમય સુધી દવા આપવાની છે તેની વિગત મેળવી લો
  • દવા કેવી રીતે આપવાની છે – જેમ કે, કેટલીક દવાઓ મોંઢા વાટે આપવાની હોય છે, બામ લગાવતી વખતે શ્વાસ વાટે, કે સ્કિન પર અપ્લાય કરવાની છે
  • જમ્યા બાદ કે જમ્યા પહેલા દવા આપવાની છે?
  • મેડિસિનને કેવી રીતે સ્ટોર કરવાની છે
  • કેટલાંક સમય સુધી દવાને ઘરમાં રાખી શકાય છે
  • દવાના કોમન સાઇડ ઇફેક્ટ્સ અથવા રિએક્શન
  • અન્ય બાળકોએ આ દવા લીધી હોય તેઓના પેરેન્ટ્સ સાથે વાતચીત કરો
  • જો બાળકને ડોઝ આપવાનું ભૂલી જવાય તો ત્યારબાદ શું કરશો?

​સાવચેતી પુર્વક દવા માટે આટલું ધ્યાન રાખો

અગાઉ જણાવ્યું તે અનુસાર, બાળકને દવા આપતા અગાઉ કેટલીક ચોક્કસ બાબતોનું ધ્યાન રાખવું જરૂરી છે. આ ઉપરાંત જે-તે દવાઓ કેવી રીતે સાવચેતી પુર્વક આપી શકાય તે જાણવું પણ એટલું જ જરૂરી છે. જેમ કે –

  • તમારાં ડોક્ટરનો સંપર્ક કરીને લક્ષણો જણાવો જેથી તે દવા આપવી કે નહીં તેની જાણકારી રહે
  • લાંબા સમયે ઉપયોગમાં નહીં લીધેલી દવાઓનો ફરીથી ઉપયોગ ટાળો
  • અન્ય વ્યક્તિને આપેલી દવાઓ તમારાં બાળક માટે ઉપયોગ ના કરો, ભલે તમારાં બાળકની ઉંમર ગમે તેટલી હોય
  • વયસ્કો માટે બનેલી દવાઓ બાળકને ક્યારેય ના આપો
  • બે પ્રકારની દવાઓ એક જ બીમારી માટે હોય તો તમારાં ડોક્ટરનો સંપર્ક કરી બાળક માટે કઇ યોગ્ય છે તેની જાણકારી મેળવી લો

​આટલું ધ્યાન રાખો

જો શરદીના લક્ષણો તમારાં બાળકને વધારે પરેશાન ના કરતા હોય તો પેરેન્ટ્સે ચિંતા કરવાની જરૂર નથી. સામાન્ય શરદીમાં દવાઓ કે ઘરેલૂ ઉપચાર કરવાનું ટાળો. કેટલાંક બાળકોને હવામાનમાં ફેરફાર થતાં શરૂઆતના દિવસોમાં શરદી કે ખાંસી થઇ જતી હોય છે જે ખૂબ જ સામાન્ય બાબત છે. બાળકની બીમારી વિશે ડોક્ટરની સલાહ લીધા બાદ જ, ખાસ કરીને બે વર્ષ કે તેનાથી નાના બાળકને ઉંઘવામાં તકલીફ થતી હોય ત્યારે દવાઓ શરૂ કરો.

નોંધઃ આ લેખ માત્ર સામાન્ય જાણકારી માટે છે, તે કોઇ પણ પ્રકારે દવા કે ઇલાજનો પર્યાય હોઇ શકે નહીં. વધુ માહિતી માટે તમારાં ડોક્ટરનો સંપર્ક કરો.

Source link