નડિયાદમાં સગીરા સાથે જઘન્ય કૃત્ય કરનારા આરોપીને આજીવન કેદની સજા!

 

નડિયાદઃ લગ્ની લાલચે સગીરાને ભગાડી જઈને તેના પર બળાત્કાર ગુજારનારા નડિયાદના આરોપીને આજીવન કેદની સજા ફટકારવામાં આવી છે. આરોપી નવ મહિના પહેલા 14 વર્ષની છોકરીને પ્રેમજાળમાં ફસાવીને લગ્નની લાલચ આપીને રાતના સમયે ભગાડીને લઈ ગયો હતો. સગીરા પોતાના ઘરની બહાર આવેલા બાથરુમમાં જઈ રહી હતી ત્યારે આરોપી તેને ભગાડી ગયો હતો. આ પછી તેના પર દુષ્કર્મ ગુજાર્યું હતું, જેના કેસમાં નડિયાદની કોર્ટે આરોપીને સખત સજા ફટકારી છે.

મળતી વિગતો પ્રમાણે 17 જૂન 2021ના રોજ 14 વર્ષ અને 6 માસની સગીરાને તેના ઘરની બહારથી આરોપી બળજબરી પૂર્વક પોતાની સાથે લઈ ગયો હતો. આરોપી તેને કરમસદ રેલવે સ્ટેશન લઈ ગયો હતો અને તેની સાથે તેની મરજી વિરુદ્ધ દુષ્કર્મ ગુજાર્યું હતું. આ પછી આરોપી તેને અમદાવાદ અને ઉત્તસંડા લઈ ગયો હતો અને ત્યાં પણ તેની મરજી વિરુદ્ધ તેની સાથે સંબંધ બાંધ્યા હતા. આ મામલે પીડિતાના પિતાએ નડિયાદ ટાઉન પોલીસને ફરિયાદ કરી હતી. પોલીસે આરોપીની ધરપકડ કરીને જરુરી કાર્યવાહી કરી હતી.

પોલીસે આરોપી સામેની ચાર્જશીટ નડિયાદ સ્પેશિયલ પોક્સો કોર્ટમાં રજૂ કરી હતી, અહીં જજ ડીઆર ભટ્ટીની કોર્ટમાં સરકારી વકીલ ધવલ બારોટે 15 જેટલા દસ્તાવેજોના આધારે 12 જેટલા સાક્ષીઓની જુબાની રજૂ કરી હતી. આ સાથે સરકારી વકીલે એવી પણ દલીલ કરી હતી કે ભોગ બનનારી કિશોરી કુમળી વયની છે અને તેણે કોર્ટમાં નેચરલ કોર્સમાં જુબાની આપી છે, જેને ધ્યાને લઈને આરોપીને સખતમાં સખત સજા કરવી જોઈએ. કોર્ટે આરોપીને આઈપીસીની કલમ 363, 366, 376 (1), પોક્સો કલમ હેઠળ આજીવન કેસની સજા ફટકારી છે.

આમ, આરોપીએ કરેલા જઘન્ય કૃત્ય કર્યું હતું તે અંગે તેણે કોર્ટના જજ સમક્ષ તમામ વિગતો પીડિતા દ્વારા જણાવામાં આવી હતી. આરોપીને દંડ કરવાની સાથે ભોગ બનનારી પીડિતાના વળતર ચૂકવવાનો પણ આદેશ કર્યો છે.

Source link