દ્વારકામાં કોંગ્રેસ ચિંતન શિબિરમાં ભાગ લેવા પહોંચ્યા રાહુલ ગાંધી, દ્વારકાધીશના દર્શન કર્યા!

 

દેવભૂમિ દ્વારકા: આગામી ગુજરાત વિધાનસભા ચૂંટણીને લઈને કોંગ્રેસની ચિંતન શિબિર શરૂ થઈ છે. ત્રણ દિવસના આ ચિંતન શિબિરમાં હાજરી આપવા માટે રાહુલ ગાંધી ગુજરાતના પ્રવાસે આવી પહોંચ્યા છે. પ્રાપ્ત માહિતી અનુસાર જામનગર એરપોર્ટ પર રાહુલ ગાંધીનું ભવ્ય સ્વાગત કરવામાં આવ્યું હતું. ત્યારબાદ રાહુલ ગાંધી દ્વારકામાં દ્વારકાધીશ ભગવાનના દર્શન કરવા માટે આવી પહોંચ્યા છે. જ્યાં રાહુલ ગાંધીએ પહેલા ભગવાન દ્વારકાધીશની ધજા માથે ચડાવી દ્વારકાધીશ સામે શીશ ઝૂકાવ્યું હતું.

દ્વારકામાં રાહુલ ગાંધીનું સ્વાગત કરાયું
પ્રાપ્ત માહિતી અનુસાર શનિવારે રાહુલ ગાંધી દ્વારકામાં હેલિપેડ ખાતે આવી પહોંચતા કોંગ્રેસ અધ્યક્ષ જગદીશ ઠાકોર,અમિત ચાવડા, ભરતસિંહ સોલંકી અને હાર્દિક પટેલ સહિતના કોંગી નેતાઓએ તેમનું સ્વાગત કર્યું હતું. હેલિપેડથી રાહુલ ગાંધી દ્વારકાધીશ દર્શન કરવા પહોંચ્યા હતા.

Rahul Gandhi Gujarat Visit

કોગ્રેસના દિગ્ગજ નેતાઓ હાજર રહ્યા
મહત્વનું છે કે ચિંતન શિબિરમાં કોંગ્રેસના પ્રદેશ અધ્યક્ષ જગદીશ ઠાકોર, પ્રભારી રઘુ શર્મા સહિતના દિગ્ગજ નેતાઓ હાજર રહ્યા હતા. જગદીશ ઠાકોરે કાર્યકરોને સંબોધતા કહ્યું હતું, જેમની સામે લડાઈ લડવાની છે તેઓ કાવતરાખોર છે. જ્યારે રઘુ શર્માએ કહ્યું કે, કોંગ્રેસ પાર્ટી એક વિચારધારા સાથે ચાલતી પાર્ટી છે. કોંગ્રેસ 5 નેતાઓથી નથી ચાલતી, તે લાખો કર્યાકર્તાઓ પાર્ટીની સાથે છે અને તાકાત છે. ચિંતન શિબિરમાં વરિષ્ઠ નેતાઓની અધ્યક્ષતામાં 10 અલગ અલગ ગ્રુપ બનાવીને મોંઘવારી, બેરોજગારી, મહિલા સુરક્ષા જેવા મુદ્દાઓ પર પણ ચર્ચા કરવામાં આવી હોવાનું જાણવા મળ્યું છે.

દ્વારકાધીશ સામે ઝૂંકાવ્યું શીશ
રાહુલ ગાંધીએ સૌપ્રથમ દ્વારકા મંદિરમાં દ્વારકાધીશના દર્શન કર્યા હતા. ત્યારબાદ બપોરે 1:30 કલાકે ચિંતન શિબિરમાં ભાગ લેવા માટે પહોંચ્યા હતા. રાહુલ ગાંધી ચિંતન શિબિરમાં કોંગ્રેસના કાર્યકરો તેમજ આગેવાનોને માર્ગદર્શન તેમજ ગુજરાત વિધાનસભા ચૂંટણી જીતવા માટેનો રોડમેપ તૈયાર કરશે.

Rahul Gandhi in Dwarka Gujarat

દ્વારકામાં કોંગ્રેસની ચિંતન શિબિરનો બીજો દિવસ
ઉલ્લેખનીય છે કે, દ્વારકા ખાતે આયોજીત ત્રિદિવસીય ચિંતન શિબિરમાં ગુજરાતના નાગરિકોને સ્પર્શતા જુદા જુદા મુદ્દાઓની વિષયવાર આગેવાનો, કાર્યકરો અને પદાધિકારીઓ સાથે ચર્ચા કરવા માટે વિવિધ 10 જુથોમાં ડેલીગેટોને વહેચવામાં આવ્યા હતા. જેમાં બેરોજગારી, ભ્રષ્ટાચાર, કાયદો વ્યવસ્થા, મહિલા સુરક્ષા, શિક્ષણ, આરોગ્ય, કોરોના મહામારી, ખેડૂતો-ખેતીની સમસ્યા, આર્થિક અવ્યવસ્થા, શહેરી સમસ્યા સહિતના 18 જેટલા મુદ્દાઓ ત્રણ દિવસની ચિંતન શિબિરમાં પ્રથમ દિવસે ચર્ચા કરાઈ હતી.

Source link