જે વાહનચાલકો સીસીટીવીથી બચવા નંબર પ્લેટ વાળતા હોય છે તેઓ ચેતે, થશે કડક કાર્યવાહી!

 

ઘણાં એવા વાહનચાલકો છે કે જેઓ ટ્રાફિકના નિયમનો ભંગ કરીને ઈ-મેમોથી બચવા માટે વ્હીકલની એચએસઆરપી (HSRP) નંબર પ્લેટને એક તરફથી વાળી દેતા હોય છે. જેથી ટ્રાફિક કંટ્રોલ રૂમના કેમેરામાં જે તે વાહનનો ચોક્કસ નંબર જાણી નહીં શકાતા ઈ-મેમો ઈસ્યુ થઈ શકતા નથી. જોકે આ બાબતે ગાંધીનગર ખાતે ઉચ્ચ અધિકારીઓની બેઠકમાં નોંધ લઈને આકરી કાર્યવાહી કરવાની સૂચના આપવામાં આવી છે.

 

જે વાહનચાલકો સીસીટીવીથી બચવા નંબર પ્લેટ વાળતા હોય છે તેઓ ચેતે

હાઈલાઈટ્સ:

  • એચએસઆરપી (HSRP) એક પ્રકારનો સરકારી દસ્તાવેજ છે. જેની સાથે ચેડા કરવા ગંભીર ગુનો છે.
  • તેઓ સામે દસ્તાવેજોમાં ચેડા કરવાનો ગુનો નોંધીને ધરપકડ કરીને જેલમાં મોકલવા સુધીની કાર્યવાહી કરાશે.
  • કેટલાંક વાહનચાલકો ટ્રાફિકના નિયમનો ભંગ કરવાની સાથે-સાથે ઈ-મેમોના દંડથી બચવા માટે વિવિધ ટ્રિક અપનાવતા હોવાનું ધ્યાને આવ્યું છે.
અમદાવાદ: આજથી લગભગ 5 વર્ષ પહેલા ગુજરાતનો મહત્વાકાંક્ષી ઈ-ચલણ પ્રોજેક્ટ (e-challan project in Gujarat) લૉન્ચ કરાયો હતો. ગુજરાતના વિવિધ શહેરોના ટ્રાફિક પોઈન્ટ ઉપર લગાવવામાં આવેલા ટ્રાફિક કંટ્રોલ રૂમમાંથી નિયમોનો ભંગ કરનાર વાહનચાલકોના નંબર નોંધીને તેનો ફોટો પાડીને ઈ-મેમો તૈયાર કરવામાં આવે છે. જે આરટીઓમાં રજિસ્ટર્ડ થયેલા સરનામા પર મોકલવામાં આવે છે. તેમ છતાં કેટલાંક વાહનચાલકો ટ્રાફિકના નિયમનો ભંગ કરવાની સાથે-સાથે ઈ-મેમોના દંડથી બચવા માટે વિવિધ ટ્રિક અપનાવતા હોવાનું ધ્યાને આવ્યું છે.

ઘણાં એવા વાહનચાલકો છે કે જેઓ ટ્રાફિકના નિયમનો ભંગ કરીને ઈ-મેમોથી બચવા માટે વ્હીકલની એચએસઆરપી (HSRP) નંબર પ્લેટને એક તરફથી વાળી દેતા હોય છે. જેથી ટ્રાફિક કંટ્રોલ રૂમના કેમેરામાં જે તે વાહનનો ચોક્કસ નંબર જાણી નહીં શકાતા ઈ-મેમો ઈસ્યુ થઈ શકતા નથી. જોકે આ બાબતે ગાંધીનગર ખાતે ઉચ્ચ અધિકારીઓની બેઠકમાં નોંધ લઈને આકરી કાર્યવાહી કરવાની સૂચના આપવામાં આવી છે. જેમાં જણાવાયું છે કે આવા વાહનચાલકો સામે ગુનો નોંધીને વાહન જપ્ત કરવામાં આવે.

આ અંગે અમદાવાદ શહેરના ટ્રાફિક જોઈન્ટ પોલીસ કમિશનરે જણાવ્યું કે એચએસઆરપી (HSRP) એક પ્રકારનો સરકારી દસ્તાવેજ છે. જેની સાથે ચેડા કરવા ગંભીર ગુનો છે. જો કોઈ વ્યક્તિ ટ્રાફિકના દંડથી બચવા માટે નંબર પ્લેટ વાળતા હોય કે પછી નંબર ઉપર માટી લગાવતા હોય તેઓ સામે દસ્તાવેજોમાં ચેડા કરવાનો ગુનો નોંધીને ધરપકડ કરીને જેલમાં મોકલવા સુધીની કાર્યવાહી કરાશે. હવે આ માટેની ઝુંબેશ શરૂ કરવામાં આવશે.અહીં નોંધનીય છે કે રાજ્યના મોટાભાગના શહેરોના 85થી 90% લોકોએ ટ્રાફિકના નિયમનો ભંગ કરવા બદલ દંડ રૂપે અપાયેલા ઈ-ચલણના પૈસા ભર્યા નહીં હોવાનું એક નવા ડેટામાં સામે આવ્યું છે. ઈ-ચલણની નહીં ભરાયેલી રકમનો આંકડો રૂપિયા 500 કરોડ કરતા પણ વધુ હોવાનું સામે આવ્યું છે. જો અમદાવાદ શહેરની વાત કરીએ તો અહીં વર્ષ 2015થી ટ્રાફિકના નિયમનો ભંગ કરનારને ઈ-ચલણ ઈશ્યુ કરવામાં આવી રહ્યા છે. જેમાં અત્યાર સુધીમાં 72.54 લાખ ટ્રાફિક ઈ-ચલણ ઈશ્યુ કરવામાં આવ્યા છે. જેની કુલ રકમ 253 કરોડ જેટલી થાય છે. જેમાં અત્યાર સુધીમાં રૂપિયા 198 કરોડની ટ્રાફિક દંડની રકમ વસૂલવાની બાકી છે. માટે ટ્રાફિક ડ્રાઈવ યોજીને વાહનચાલકો પાસેથી બાકી દંડની રકમ વસૂલવામાં આવે છે. ટ્રાફિક વિભાગનું કહેવું છે કે રેડ લાઈટ સિગ્નલનો ભંગ કરનાર અને સ્ટોપ લાઈન ઓળંગનારને ઈ-ચલણ ઈશ્યુ કરવામાં આવે છે.

Source link