જેલમાંથી બહાર આવીને યુવરાજસિંહનો ‘યુવા નવનિર્માણ સેના’ બનાવવાનો નિર્ણય, કઈ રીતે કામ કરશે આ સંગઠન?

 

અમદાવાદઃ કોન્સ્ટેબલ પર કાર ચઢાવી દેવાના ગુનામાં જેલના સળિયા પાછળ ધકેલાયેલા યુવરાજસિંહને જેલમાંથી મુક્તિ મળતાની સાથે જ તેઓ બમણા જુસ્સા સાથે યુવાનો માટે લડવાની વાત કરી છે. વિદ્યાર્થી નેતા યુવરાજસિંહે પોતાની સેના ઉભી કરવાની જાહેરાત કરી છે. યુવા નવનિર્માણ સેનાની રચના કરવાની જાહેરાત સાથે યુવરાજસિંહે જણાવ્યું કે આ સેના વિદ્યાર્થીઓના પ્રશ્નોને વાચા આપશે. આ સાથે આ સંગઠન સંપૂર્ણ રીતે બિનરાજકીય હશે તેમ પણ તેમણે જણાવ્યું છે. મહત્વનું છે કે યુવરાજસિંહને ગાંધીનગરમાં કોન્સ્ટેબલ પર ગાડી ચઢાવી દેવાના કેસમાં શનિવારે સેશન્સ કોર્ટમાંથી જામીન મળ્યા છે.

યુવરાજસિંહે મીડિયા સમક્ષ જણાવ્યું છે કે, “શિક્ષિત, અર્ધશિક્ષિત કે બિનશિક્ષિત હોય તે તમામના પ્રશ્નો અમે ઉપાડીશું, અને જે પણ યુવાનોની માગણી છે, યુવાનોના ભાવી સાથે અન્યાય થઈ રહ્યો છે, ત્યારે અમે તેમની વેદનાને વાચા આપવાનો પ્રયાસ કરીશું અને યુવાનોના ભાવી સાથે જે ચેડા થઈ રહ્યા છે તેને અટકાવવાનો પ્રયાસ યુવા નવનિર્માણ સેના કરશે.” થતા ચેડા અટકાવવાનો પ્રયાસ યુવા નવનિર્માણ સેના કરશે.

પોતાના પર થયેલા કેસ અંગે યુવરાજસિંહે જણાવ્યું કે, કોઈને પણ અમારો મારવાનો ઈરાદો ક્યાંય પણ નહોતો, અમારો ઈરાદો બચાવવાનો હતો. પરંતુ જે રીતે આ બાબતને રજૂ કરવામાં આવી છે તે અંગે અમે ન્યાયિક પ્રક્રિયા દ્વારા જવાબ આપીશું. LRDની પરિક્ષામાં ગેરરિતિ અંગે યુવરાજસિંહે જણાવ્યું કે, નાની મોટી કેટલાક કિસ્સા બન્યા હતા જે વિદ્યાર્થીઓ દ્વારા મને મળ્યા છે. જેની આગળ રજૂઆત કરવામાં આવશે. જેથી સીસીટીવી ફૂટેજ દ્વારા જે સત્ય અને તથ્ય હોય તે બહાર આવી શકે.

આ સાથે તેમણે જણાવ્યું કે LRDની પરીક્ષા દરમિયાન કોઈ મોટી ગેરરિતી કે માસ ચિંટિંગનો મુદ્દો સામે આવ્યો નથી. પરંતુ જો કોઈ મુદ્દો સામે આવશે તો પોલીસ નિમણૂક બોર્ડમાં આ અંગે રજૂઆત કરીશું.

મહત્વનું છે કે યુવરાજસિંહ જાડેજા નામના વિદ્યાર્થી નેતા સતત સ્પર્ધાત્મક પરીક્ષાની તૈયારીઓ કરતા વિદ્યાર્થીઓની સાથે રહીને તેમના પ્રશ્નોને મીડિયા સમક્ષ લાવે છે અને તેમાં જવાબદાર લોકો હોય તેમની સામે કાર્યવાહી થાય તે માટે પોલીસ અને સરકાર સમક્ષ પૂરાવા રજૂ કરતા રહે છે. આ જ રીતે જ્યારે તેઓ ગાંધીનગરમાં વિદ્યાસહાયકોની મદદ માટે પહોંચ્યા હતા ત્યારે તેમની ગાડીના બોનેટ પર કોન્સ્ટેબલ લટકેલા દેખાયા હતા અને આ વીડિયો ફૂટેજના આધારે પોલીસે તેમની સામે 307ની કલમ હેઠળ ધરપકડ કરીને કાર્યવાહી કરી હતી. જોકે, તેમને શનિવારે જામીન મળતા હવે તેમણે વિદ્યાર્થીઓની મદદ માટે યુવા નવનિર્માણ સેના નામનું સંગઠન બનાવવાનો નિર્ણય કર્યો છે.

Source link