જિગ્નેશ મેવાણીની અડધી રાત્રે ધરપકડ થતાં હાર્દિક પટેલે સરકારને આપી ચેતવણી

 

Jignesh Mevani Arrest: વડગામના ધારાસભ્ય જિગ્નેશ મેવાણીની એક ટ્વીટને કારણે અડધી રાત્રે આસામ પોલીસ દ્વારા ધરપકડ કરવામાં આવી હતી. એક ટ્વીટના કારણે અડધી રાત્રે ધારાસભ્યની ધરપકડ કરાતાં ગુજરાતનું રાજકારણ ગરમાયું છે અને આ મામલે વિપક્ષી પાર્ટીઓ દ્વારા સત્તા પક્ષ ઉપર આકરાં પ્રહાર કરવામાં આવી રહ્યા છે. આ વચ્ચે કોંગ્રેસ નેતા હાર્દિક પટેલે (Hardik Patel) પણ જિગ્નેશ મેવાણીની ધરપકડને લઈને સરકારને ચેતવણી આપી છે અને સાથે જ કહ્યું છે કે, હવે તો દેશમાં ધારાસભ્ય પણ સુરક્ષિત નથી.

હવે દેશમાં ધારાસભ્ય પણ સુરક્ષિત નથી- હાર્દિક પટેલ
હાર્દિક પટેલે ટ્વીટ કરતાં લખ્યું છે કે, કાલે અડધી રાત્રે ધારાસભ્ય જિગ્નેશ મેવાણીની આસામ પોલીસે ધરપકડ કરી છે. ફક્ત એક ટ્વીટને કારણે ધરપકડ અને તે પણ અડધી રાત્રે, કાંઈક તો ગડબડ છે. મારી સરકારને ચેતવણી છે કે, જિગ્નેશ મેવાણીની સાથે કાંઈપણ થયું તો, જવાબદારી તમારી હશે. હવે તો દેશમાં ધારાસભ્ય પણ સુરક્ષિત નથી.

ભડકાઉ ટ્વીટને કારણે આસામ પોલીસે અડધી રાત્રે મેવાણીની ધરપકડ કરી
વડગામના ધારાસભ્ય અને દલિત નેતા જિગ્નેશ મેવાણીની બનાસકાંઠા જિલ્લાના પાલનપુર સર્કિટ હાઉસમાંથી ગત રાત્રિના 11.30 વાગ્યે આસામ પોલીસ દ્વારા ધરપકડ કરવામાં આવી હતી. પ્રાઈમ મિનિસ્ટર નરેન્દ્ર મોદી ઉપર કરવામાં આવેલી એક ટ્વીટને કારણે તેમની ધરપકડ કરવામાં આવી હતી. તેઓએ ટ્વીટ કરીને લખ્યું હતું કે, પીએમ મોદી, કે જેઓ ગોડસેને ભગવાન માને છે, તેઓ 20 તારીખથી ગુજરાત પ્રવાસ પર છે, અને તેઓએ ગુજરાતના ખંભાત, વેરાવળ અને હિંમતનગરમાં થયેલાં કોમી રમખાણો મામલે શાંતિ અને અમનની અપીલ કરવી જોઈએ. મહાત્મા મંદિરના નિર્માતા પાસેથી આટલી તો આશા બને છે ને? આ ઉપરાંત અન્ય એક ટ્વીટમાં મેવાણી દ્વારા રાષ્ટ્રીય સ્વંય સેવક સંઘ ઉપર પણ આકરાં પ્રહાર કરતી એક ટ્વીટ કરવામાં આવી હતી.

જિગ્નેશ મેવાણી સામે સેક્શન 120બી (ક્રિમિનલ ષડયંત્ર), સેક્શન 153એ (બે સમુદાય વચ્ચે દુશ્મનાવટને પ્રોત્સાહન આપવું), 295એ, 504 (શાંતિના ભંગને ઉશ્કેરવાના હેતુથી ઇરાદાપૂર્વકનું અપમાન) અને આઈટી એક્ટ હેઠળ ગુનો નોંધવામાં આવ્યો છે. આ મામલે કોંગ્રેસ નેતા રાહુલ ગાંધીએ મેવાણીની ધરપકડને ગેરબંધારણીય અને બિનલોકતાંત્રિક ગણાવી છે અને કહ્યું છે કે, સત્યને કચડી નાખવાનો પ્રયાસ કરીને તેને કેદ કરી શકતા નથી. રાહુલ ગાંધીએ લખ્યું કે, તમે રાજ્યની મશીનરીનો દુરુપયોગ કરીને અસંમતિને કચડી નાખવાનો પ્રયાસ કરી શકો છો, પણ તમે ક્યારેય સત્યને કેદ કરી શકતા નથી. આ સાથે તેઓએ #DaroMat અને #SatyamevJayate હેશટેગ શેર કર્યાં હતા.

 

Source link