જામીન મળ્યા બાદ આખરે જેલમાંથી મુક્ત થયા મેવાણી, મોડી સાંજ સુધી અમદાવાદ પહોંચશે!

 

બારપેટાઃ ગુજરાતના દલિત નેતા જીગ્નેશ મેવાણી (Dalit leader Jignesh Mevani)ને શનિવારે અસમના કોકરાઝર શહેરમાં કાયદાકીય ઔપચારિકતા પૂરી કર્યા બાદ જેલમાંથી મુક્ત (Jignesh Mevani released from jail) કરવામાં આવ્યા છે. અસમના કોન્સ્ટેબલ પર હુમલાના કેસમાં જીગ્નેશ મેવાણીને જેલમાંથી મુક્તિ મળી છે. જીગ્નેશ મેવાણી મોડી સાંજે અમદાવાદ પહોંચશે. ત્યારે જામીન મળ્યા બાદ જીગ્નેશ મેવાણીએ જણાવ્યું કે, મારા જામીનનો આદેશ તેનાં પોતાનામાં જ એક ન્યાયશાસ્ત્ર છે. જ્યારે જીગ્નેશ મેવાણીને ગુવાહાટીથી કોકરાઝર લાવવામાં આવી રહ્યા હતા ત્યારે તેમના પર એક મહિલા પોલીસ પર હુમલો કરવાનો આરોપ લાગ્યો હતો. જે બાદ મંગળવારે કોર્ટે જીગ્નેશ મેવાણીને પાંચ દિવસની પોલીસ કસ્ટડીમાં મોકલ્યા હતા. ત્યારે શુક્રવારે બારપેટા જિલ્લાની કોર્ટે જીગ્નેશ મેવાણીને જામીન આપ્યા હતા. હાલ જીગ્નેશ મેવાણી કોકરાઝરથી ગુવાહાટી જઈ રહ્યા છે અને મોડી સાંજ સુધીમાં અમદાવાદ પહોંચશે.

મહત્વનું છે કે, આ દરમિયાન કોર્ટે અસમ પોલીસ પર જીગ્નેશ મેવાણીને ફસાવ્યા હોવાની વાત કરીને પોલીસની ઝાટકણી કાઢી હતી. કોર્ટે કહ્યું હતું કે, પોલીસની આવા પ્રકારની મનમાની રોકવામાં નહીં આવે તો આપણું રાજ્ય એક પોલીસ સ્ટેટ બની જશે. ગુજરાતના અપક્ષ ધારાસભ્ય જીગ્નેશ મેવાણીની ગયા અઠવાડિયે અસમ પોલીસે ગુજરાતમાંથી ધરપકડ કરી હતી. પીએમ મોદી વિરુદ્ધ એક કથિત ટ્વિટ મામલે જીગ્નેશ મેવાણીની ધરપકડ કરવામાં આવી હતી. જીગ્નેશ મેવાણીએ ટ્વિટમાં દાવો કર્યો હતો કે, પીએમ મોદી ગોડસેને ભગવાન માનતા હતા.

જીગ્નેશ મેવાણી બનાસકાંઠાના વડગામના ધારાસભ્ય છે અને તેઓએ કોંગ્રેસનો સમર્થન આપવાનું વચન આપ્યું હતું. આ જ ટ્વિટનો ઉપયોગ કરીને પીએમ મોદીની ગુજરાત મુલાકાત દરમિયાન સાંપ્રદાયિક સૌહાર્દની અપીલ કરવા માટે પણ વિનંતી કરી હતી. પોતના ટ્વિટ મામલે જામીન મળ્યા બાદ ગુજરાતના દલિત નેતા જીગ્નેશ મેવાણી પર વધુ એક આરોપ લાગ્યો હતો. કોકરાઝરમાં જીગ્નેશ મેવાણી સાથે ગયેલી પોલીસ પાર્ટીમાં સામેલ એક મહિલા પોલીસ પર હુમલો કરવાનો આરોપ લાગ્યો હતો. એ પછી જીગ્નેશ મેવાણીની ફરી ધરપકડ કરવામાં આવી હતી. જે મામલે બારપેટામાં ફરિયાદ નોંધાઈ હતી.

આ કેસમાં જીગ્નેશ મેવાણી પર આઈપીસીની કલમ 294 (જાહેરમાં અશ્લીલ શબ્દો બોલવા), 323 (સ્વેચ્છાએ નુકસાન પહોંચાડવું), 353 (ફરજ પર તૈનાત સરકારી કર્મચારી પર જાહેરમાં હુમલો કરવો) અને 354 (અપમાન કરવાના ઈરાદે એક મહિલા પર ફોજદારી બળનો ઉપયોગ કરવો) હેઠળ ગુનો નોંધવામાં આવ્યો હતો.

Source link