જન્મથી જ દુર્લભ બીમારીના કારણે શારીરિક વિકાસ રૂંધાયો પણ સપનાં નહીં, ધો.10ની પરીક્ષા પાસ કરી ઉચ્ચ અભ્યાસ કરવા મક્કમ

 

અમદાવાદ: હબીબ કુરેશી (Habib Qureshi) દેખાવમાં ભલે નાના બાળક જેવો લાગતો હોય પરંતુ તેની ઉંમર 16 વર્ષ છે અને આગામી 28 માર્ચથી શરૂ થઈ રહેલી ધોરણ 10 (Class 10 Board Exam)ની બોર્ડની પરીક્ષા આપશે. હબીબના આ અસામાન્ય દેખાવ માટે મોરકિયો (Morquio Syndrome) સિન્ડ્રોમ જવાબદાર છે. આ એવી દુર્લભ જેનેટિક કંડિશન છે જે હાડકાં, કરોડરજ્જુ, અંગો અને શારીરિક વિકાસને અસર કરે છે. મિર્ઝાપુરના રહેવાસી હબીબની હાઈટ 1.5 ફૂટ છે. તે અડધો કલાકથી વધારે લખી કે ચાલી નથી શકતો પરંતુ તેની આ સ્થિતિને તે પોતાના સપનાંને આડે નથી આવવા દેવા માગતો.

હબીબના પિતા ઈસ્માઈલ કુરેશી (Ismail Qureshi) દુકાન ચલાવે છે અને તેના માતાનું નામ શાહરબાનુ છે. હબીબ મિર્ઝાપુરમાં આવેલી ઓરિયન્ટ હાઈસ્કૂલ (Orient High School)માં અભ્યાસ કરે છે. તેનાં માતાએ કહ્યું, “હબીબ જન્મ્યો ત્યારે બધું જ સામાન્ય લાગતું હતું. જોકે, તે આઠ મહિનાનો થયો છતાં બેસતાં ના શીખતાં ડૉક્ટરને બતાવવા માટે અમે તેને હોસ્પિટલ લઈ ગયા જ્યાં તે મોરકિયો સિન્ડ્રોમથી પીડાતો હોવાનું નિદાન થયું હતું. આ કંડિશનથી પીડાતા બાળકોના શરીરમાં પૂરતા પ્રમાણમાં એન્ઝાઈમ્સ ઉત્પન્ન થતાં નથી. શરીરમાં કુદરતી રીતે ઉત્પન્ન થતી શુગર ચેઈનને આ એન્ઝાઈમ્સ તોડી પાડતાં હોય છે. પરંતુ આ બાળકોના શરીરમાં આમ ના થતું હોવાથી તેમના શારીરિક વિકાસ પર અસર પડે છે.”

habib qureshi

ડૉક્ટરોએ હબીબને ફિઝિયોથેરાપી લેવાની સલાહ આપી હતી પરંતુ તે લીધા છતાં તેના શરીરમાં કોઈ ફરક ના પડ્યો તેમ હબીબના માતાએ જણાવ્યું.

શાહરબાનુએ આગળ કહ્યું, “તેની હાઈટના કારણે તેની ઉંમર બે વર્ષ હોય તેવું લાગે છે પરંતુ તેની ઈચ્છાશક્તિ ખૂબ પ્રબળ છે અને તે હોંશિયાર વિદ્યાર્થી છે. તેણે ઉચ્ચ અભ્યાસ કરવાનો દ્રઢ નિશ્ચય કર્યો છે.” શાહરબાનુનો એક મોટો દીકરો છે જે MScના બીજા વર્ષમાં અભ્યાસ કરે છે.

“હબીબ ચાલી ના શકતો હોવાથી તેને રોજ સ્કૂલે તેડીને મૂકવા જવો પડે છે. ગત શિયાળામાં તેને ગંભીર એલર્જી થઈ હોવાથી સ્કૂલે નહોતો મોકલી શકાયો. તેણે ધોરણ 10ની તૈયારી ઘરે જ કરી છે”, તેમ તેના માતાએ ઉમેર્યું. બોર્ડની પરીક્ષામાં પેપર લખવા માટે ગુજરાત સેકન્ડરી અને હાયર સેકન્ડરી બોર્ડ (GSHEB)એ હબીબને રાઈટરની મંજૂરી આપી છે.

Source link