ગ્રીષ્મા વેકરિયા મર્ડર કેસ: દોષિત ફેનિલ ગોયાણીને 26મીએ સજા થાય તેવી શક્યતા!

 

સુરત: રાજ્યભરમાં ચકચાર જગાવનાર ગ્રીષ્મા વેકરિયા હત્યાકાંડમાં ગુરુવારે કોર્ટ દ્વારા આરોપી ફેનિલને કસૂરવાર ઠેરવવામાં આવ્યો હતો. શુક્રવારે ગ્રીષ્માની ઘાતકી હત્યા કરનાર ફેનિલને સજાનું એલાન થવાનું હતું પરંતુ કોર્ટે બંને પક્ષોની દલીલો બાદ 26મી એપ્રિલ તારીખ આપી હતી. જેથી ફેનિલને 26મીએ સંભવત: સજા સંભળાવવામાં આવે તેવી શક્યતા છે. ઉલ્લેખનીય છે કે, ભારે સુરક્ષા બંદોબસ્ત વચ્ચે પોલીસ આરોપી ફેનિલને લઈને કોર્ટ પહોંચી હતી જ્યાં કોર્ટ દ્વારા સખત શબ્દોમાં ઘાતકી હત્યા વખોડી દઈ આરોપીને દોષિત જાહેર કરવામાં આવ્યો હતો. દરમિયાન ગ્રીષ્મા વેકરિયાના પરિવાજનો આરોપીને ફાંસીની સજાની માંગ સાથે કોર્ટ પહોંચ્યા હતા.

પ્રાપ્ત માહિતી અનુસાર ફેનિલ ગોયાણીને ગુરુવારે કોર્ટ દ્વારા તકસીરવાર ઠેરવ્યા બાદ શુક્રવારે સજા પર દલીલો શરૂ કરવામાં આવી હતી. જેમાં સરકારી વકીલે દલીલ કરતા કહ્યું કે, અમારો કેસ માત્ર વિડીયો પર આધારિત નથી. આરોપી ક્રિમિનલ માનસિકતા ધરાવતો હતો અને ગણતરીપૂર્વક તેણે હત્યા કરી છે. આરોપીએ હત્યા કરવા પહેલા રેકી કરી હતી. ગુનાના દિવસે ગ્રીષ્માની કોલેજમાં તેને શોધવા ગયો હતો. એટલું જ નહીં, ફેનિલે હત્યા પહેલા ગ્રીષ્માની મિત્ર ધૃતિને ફોન કરીને જણાવ્યું હતું કે, તે ગ્રીષ્માના ઘરે જઈને કઈંક મોટું કરવાનો છે.

સરકારી વકીલ ગળગળા થઈ ગયા
કોર્ટ સમક્ષ પોતાની દલીલો રજૂ કરી રહેલા સરકારી વકીલ નયન સુખડવાલા એક તબક્કે ગળગળા થઈ જતાં સમગ્ર કોર્ટમાં પણ નિરવ શાંતિ છવાઈ જવા પામી હતી. તેઓએ દલીલ દરમિયાન જણાવ્યું હતું કે, દરેક પરિવાર પોતાના કાળજાના કટકા સમાન પુત્રીના લગ્નની વિદાય અને અંતિમ વિદાય સમયે ચોધાર આંસુ રડતા હોય છે ત્યારે આરોપી ફેનિલ દ્વારા જે ઘાતકી હત્યા કરવામાં આવ્યું છે તે ખરેખર સખત સજા પાત્ર છે.

કોર્ટે 69 દિવસમાં જ દોષિત જાહેર કર્યો
12 ફેબ્રુઆરીએ પાસોદરામાં એકતરફી પ્રેમમાં ગ્રીષ્મા વેકરિયાની ઘાતકી હત્યા કરનાર આરોપી ફેનિલ ગોયાણીને કોર્ટ દ્વારા માત્ર 69 દિવસમાં જ દોષિત જાહેર કરવામાં આવ્યો હતો અને કોર્ટ કાર્યવાહી દરમિયાન સરકાર પક્ષ દ્વારા ત્રણ દિવસ સુધી દલીલ કરવામાં આવી હતી. જેમાં આરોપી દ્વારા ઉશ્કેરાટમાં હત્યા કરવામાં આવી હોવાનો ઈન્કરાર કર્યો હતો. આ સિવાય કોર્ટ દ્વારા 190 પૈકી 105 સાક્ષીઓની જુબાની લેવામાં આવી હતી અને 85 સાક્ષીઓને ડ્રોપ કરાયા હતા.

એક સપ્તાહમાં 2500 પાનાની ચાર્જશીટ
ઉલ્લેખનીય છે કે, ફેનિલ ગોયાણી ગ્રીષ્મા વેકરિયાના ઘરે પહોંચીને તેના ભાઈ પર હુમલો કરવામાં આવ્યો હતો અને ત્યારબાદ ગ્રીષ્માને સરાજાહેર ગળું કાપીને મોતને ઘાટ ઉતાર્યો હતો. પોલીસ દ્વારા માત્ર સાત જ 2500 પાનાની ચાર્જશીટ દાખલ કરવામાં આવી હતી. જેમાં પોલલીસ દ્વારા દ્વારા એફએસએલ, વોઈસ રેકોર્ડિંગ સહિતના સજ્જડ પુરાવાઓ આરોપી સામે રજૂ કરવામાં આવ્યા હતા.

Source link