ગુજરાત હાઈકોર્ટે કસ્ટોડીયલ ટોર્ચર, પરિવારને ફસાવાના કેસમાં તપાસનો આદેશ આપ્યો

 

અમદાવાદ:ગુજરાત હાઈકોર્ટ સમક્ષ દેવીપૂજક સમાજની વ્યક્તિઓ પર દમન અને અત્યાચાર ગુજારીને તેમને ગુનો કબૂલ કરવા મજબૂર કરીને ખોટા ચારતી પાંત કેસમાં ફસાવી દેવાનો ચોંકાવનારો મામલો સામે આવ્યો છે. જેમાં હાઈકોર્ટે ભારે નારાજગી વ્યક્ત કરતા આદેશ કર્યો કે, અમદાવાદ રેન્જના IGP આ સમગ્ર મામલે તપાસ કરાવે કે શું અરજદારોને ખોટા ગુનાઓમાં સંડોવી દેવાયા હતા કે કેમ? શું પોલીસ દ્વારા તેમના પર દમન ગુજારાયો હતો કે કેમ? આ તપાસ એસપી રેન્કના અધિકારી દ્વારા કરાવે અને કોર્ટ સમક્ષ રિપોર્ટ રજૂ કરવામાં આવે. તેમજ રાજ્યના ગૃહવિભાગના ડે. સેક્રેટરી પણ સોંગદનામું કરીને કોર્ટને જણાવે કે, પોલીસ દમનનો ભોગ બનનાર અરજદાર પીડિતોને સરકારે વળતર શા માટે ન ચૂકવવું જોઈએ. આ કેસની વધુ સુનાવણી 12 એપ્રિલના રોજ હાથ ધરાશે.

4 ફેબ્રુઆરી, 2015ના રોજ, ધંધુકા પોલીસ સબ-ઇન્સ્પેક્ટર રાજેન્દ્ર કરમટીયાએ અમદાવાદ જિલ્લાના તગડી ગામમાંથી દેવીપૂજક સમુદાયના સભ્યો મનસુખ કુમારખાનિયા, તેમની પત્ની મીના, તેમનો ભાઈ રસિક અને તેમની પત્ની રીનાની ધરપકડ કરી હતી. તેમના પર લૂંટના પ્રયાસમાં એક વ્યક્તિને ઝેર આપવાનો અને તેને ઇજા પહોંચાડવાનો આરોપ મૂકવામાં આવ્યો હતો. પાછળથી ચારેય અન્ય ચાર અનડિટેક્ટેડ ગુનાઓ માટે ધરપકડ કરવામાં આવી હતી, જેમાંથી એક બરવાળા પોલીસ સ્ટેશનમાં નોંધાયેલ હત્યાનો કેસ હતો.

એક મહિના પછી બરવાળા પોલીસે હત્યાના કેસમાં તેમની સામે ડિસ્ચાર્જ સમરી દાખલ કરી હતી, પરંતુ કરમટીયાએ તેમની કબૂલાતના આધારે અન્ય કેસોમાં તેમની સામે ચાર્જશીટ દાખલ કરી હતી. પોલીસ કસ્ટડીમાં તેઓને આ ગુનાઓની કબૂલાત કરવા માટે કથિત રીતે ત્રાસ આપવામાં આવ્યો હતો. તેઓએ મેજિસ્ટ્રેટ સમક્ષ અને હાઈકોર્ટમાં ફરિયાદો કરી હતી. મેડિકલ સર્ટિફિકેટમાં જાણવા મળ્યું હતું કે પોલીસ અધિકારીઓ દ્વારા તેઓને ત્રાસ આપવામાં આવ્યો હતો. બરવાળા પોલીસે તેમની સામેનો કેસ બંધ કર્યા પછી પોલીસ સામે તપાસ હાથ ધરવામાં આવી હતી, પરંતુ તેમાંથી કંઈ બહાર આવ્યું ન હતું.

તમામ કેસોમાં નિર્દોષ છૂટ્યા બાદ પરિવારે હાઈકોર્ટનો દરવાજો ખખડાવ્યો હતો, જ્યાં તેમના વકીલ હાર્દિક જાનીએ ભારપૂર્વક જણાવ્યું કે PSI એ સારા ડિટેક્શન રેટ બતાવવા માટે પરિવારને પાંચ ગુનામાં ફસાવ્યા છે. પ્રમોશન મેળવવાનો આ તેમનો પ્રયાસ હતો. કેસની સુનાવણી કર્યા પછી હાઈકોર્ટે અવલોકન કર્યું કે, અરજદારો વિરુદ્ધ ચારથી પાંચ ફરિાદો નોંધાઈ હતી અને તેમાં ચાર્જશીટ કરી દેવામાં આવી હતી અને મોટાભાગના કેસોમાં અરજદારોના કબૂલાતનામાને આધારે જ ગુનો ઉભો કરાયો હતો. એટલું જ નહીં, ટ્રાયલ કોર્ટે તમામ કેસોમાં અરજદારોને નિર્દોષ જાહેર કર્યા હતા. તે સિવાય બરવાળા પોલીસ સ્ટેશનમાં હત્યા અને લૂંટની ફરિયાદ પણ નોંધાઈ હતી. જેમાં કાયદાથી ચાલનાર પોલીસ કર્મચારીએ ફરિયાદની તપાસ કરી હતી. જેણે મેજિસ્ટ્રેટ સમક્ષ રિપોર્ટ રજૂ કર્યો હતો. અને એમાં પોલીસ દ્વારા કરવામાં આવેલા અત્યાચારનો પણ ઉલ્લેખ ક્યો હતો. જેનો આધાર તબીબ રિપોર્ટ હતો.

કોર્ટે આદેશમાં નોંધ્યું કે, રિપોર્ટ એ પણ દર્શાવે છે કે, એક ચોક્કસ વર્ગ-જ્ઞાતિમાં જન્મ્યા હોવાથી પોલીસે તેમને પકડી લીધા હતા. પોલીસનું એવું માનવું હતું કે, અરજદારો પ્રમાણિકપણે તેમની આજીવિકા રળતા હોવા છતાંય તેમણે એક ચોક્કસ સમુદાયમાં જન્મ લીધો હોવાથી અને તેમના સમાજના કેટલાક લોકો ગેરકાયદેસર પ્રવૃત્તિઓ કરતા હોવાથી તેઓ પણ કાયદાનો ભંગ કરનારી વ્યક્તિઓ હશે. કોર્ટે નોંધ્યું કે, પ્રથમ દ્રષ્ટિએ જણાય છે કે, પાંચ અરજદારોને ખોટી ફરિયાદીમાં સંડોવી કાઢવામાં આવ્યા હતા. પોલીસની ખોટી તપાસના લીધે તેમને ભારે પીડા અને વેદનામાંથી પસાર થવું પડ્યું હતું.

Source link