ગુજરાત વિદ્યાપીઠના કુલપતિ ડોક્ટર રાજેન્દ્ર ખીમાણીને તાત્કાલિક પદ પરથી હટાવવાનો UGCનો આદેશ!

 

અમદાવાદ- શહેરમાં સ્થિત શૈક્ષણિક સંસ્થા ગુજરાત વિદ્યાપીઠ જેની સ્થાપના રાષ્ટ્રપિતા મહાત્મા ગાંધી દ્વારા કરવામાં આવી હતી. મહાત્મા ગાંધી શ્રમને શિક્ષણનો ભાગ બનાવવા માંગતા હતા, તેમનો હેતુ કે નૈતિકતા, સહાનુભૂતિ, કરુણા જેવા મૂલ્યો વિદ્યાર્થીઓમાં આવે. ગાંધીજી દ્વારા આ મૂલ્યો સાથે શરુ કરવામાં આવેલી સંસ્થા અત્યારે વિવાદમાં સપડાઈ છે. ઉલ્લેખનીય છે કે યુનિવર્સિટી ગ્રાન્ટ્સ કમિશન(UGC) એ ભારતમાં યુનિવર્સિટી શિક્ષણ માટેનું સર્વોચ્ચ માળખું છે. UGC દ્વારા યુનિવર્સિટીના ચાન્સલર ઈલા ભટ્ટ સમક્ષ માંગ કરવામાં આવી છે કે વાઈસ ચાન્સલર ડોક્ટર રાજેન્દ્ર ખિમાણીને વહેલીતકે પદ પરથી હટાવવામાં આવે.

ઉલ્લેખનીય છે કે ગુજરાતની ઘણી યુનિવર્સિટીના વાઈસ ચાન્સલર બાબતે અત્યારે તપાસ ચાલી રહી છે. માનવામાં આવી રહ્યું છે કે તેઓ યુજીસી દ્વારા નિર્ધારિત કરવામાં આવેલા લાયકાતના ધોરણો પર ખરા નથી ઉતરતા. તાજેતરમાં જ યુજીસીની 554મી મીટિંગનો અમુક ભાગ જાહેર કરવામાં આવ્યો હતો જેમાં ડોક્ટર ખિમાણીની નિમણૂક બાબતે ચર્ચા કરવામાં આવી હતી.

જાહેર કરવામાં આવેલા ભાગમાં કહેવામાં આવી રહ્યું છે કે, કમિશન દ્વારા યુજીસી કમિટીના રિપોર્ટને ધ્યાનમાં લેવામાં આવ્યો છે અને જોયું કે, ગુજરાત વિદ્યાપીઠના કુલનાયક તરીકે ડોક્ટર રાજેન્દ્ર ખિમાણીની નિમણૂક કરવાની પ્રક્રિયામાં ગરબડ થઈ છે. યુજીસી દ્વારા ગઢવામાં આવેલી ફેક્ટ-ફાઈન્ડિંગ કમિટીએ શોધ્યું કે 1-4-2004થી 30-4-2019ના સમયગાળા દરમિયાન ગુજરાત વિદ્યાપીઠના રજિસ્ટ્રાર તરીકે ડોક્ટર રાજેન્દ્ર ખીમાણી અમુક વહીવટીય અને નાણાંકીય ગેરરીતિના જવાબદાર છે.

યુજીસી દ્વારા ગુજરાત વિદ્યાપીઠના ચાન્સેલરને આદેશ આપવામાં આવ્યો છે કે કુલપતિ ડોક્ટર ખીમાણીને વહેલી તકે પદ પરથી હટાવવામાં આવે. ઉલ્લેખનીય છે કે ડોક્ટર ખીમાણીએ લગભગ એક દશકથી વધારે સમય સુધી ગુજરાત વિદ્યાપીઠમાં રજિસ્ટ્રાર તરીકે ફરજ બજાવી છે. ડિસેમ્બર 2020માં તેમની કુલપતિ તરીકે નિમણુક કરવામાં આવી હતી, પરંતુ સિલેક્શન કમિટીમાં યુજીસી દ્વારા નીમવામાં આવેલ એક પણ સભ્ય ન હોવાને કારણે તેમની નિમણુકને રદ્દ કરવામાં આવી હતી.

ઉલ્લેખનીય છે કે બીજી કમિટીમાં ગુજરાત ટેક્નોલોજીકલ યુનિવર્સિટીના કુલપતિ પ્રોફેસર નવિન શેઠને યુજીસી દ્વારા નિમવામાં આવેલા સભ્ય તરીકે રાખવામાં આવ્યા હતા. બીજી કમિટી દ્વારા પણ કુલપતિ તરીકે ડોક્ટર ખીમાણીનું નામ સૂચિત કરવામાં આવ્યુ હતું. પ્રોફેસર શેઠે તેમની નિમણૂક પર પ્રશ્ન કર્યો હતો અને યુજીસીને આ બાબતે પત્ર પણ લખ્યો હતો.

મંગળવારે સાંજે જ્યારે ડોક્ટર ખીમાણીનો સંપર્ક કરવામાં આવ્યો તો તેમણે અમારા સહયોગી ટાઈમ્સ ઓફ ઈન્ડિયાને જણાવ્યું કે, મને યુજીસીના નિર્ણય અંગે હજી સુધી કોઈ ઓર્ડર મળ્યો નથી. આ પ્રકારના કોઈ પણ ઓર્ડર આપતા પહેલા કમિટીએ એકવાર મારી સાથે મુલાકાત કરવી જોઈએ અને મારો પક્ષ પણ સમજવાનો પ્રયત્ન કરવો જોઈએ. ડોક્ટર ખીમાણીએ સ્વીકાર્યું કે ગત વર્ષે જૂન-જુલાઈ મહિનામાં યુજીસીએ તેમની પાસેથી પાંચ પ્રશ્નોના ઉત્તર માંગ્યા હતા જે તેમણે આપ્યા હતા.

ગુજરાત વિદ્યાપઠીના પૂર્વ કુલપતિ ડોક્ટર સુદર્શન આયન્ગર જણાવે છે કે, મંગળવારના રોજ થયેલી કમિટીની મીટિંગમાં આ પ્રકારની કોઈ ચર્ચા નથી થઈ. કુલપતિની નિમણૂક કરવાની અને તેમને નિષ્કાસિત કરવાની સત્તા ચાન્સેલર પાસે છે.

Source link