ગુજરાતમાં સ્પર્ધાત્મક પરીક્ષાની તૈયારી કરતા બેરોજગારની વેદના, ‘નોકરી નહીં મળતા લગ્ન પણ થતાં નથી’!

 

અમદાવાદ: કોરોના વાયરસની મહામારી શરૂ થયા પછી ગુજરાતના યુવાનોમાં સરકારી નોકરીનું મહત્વ વધ્યું છે. છેલ્લાં કેટલાંક વર્ષોમાં રાજ્ય સરકાર તરફથી વિવિધ સરકારી નોકરીઓની ભરતીની જાહેરાત કરવામાં આવતા ધોરણ 12 પાસ અને ગ્રેજ્યુએટ યુવાનો દિવસ-રાત સ્પર્ધાત્મક પરીક્ષાની તૈયારીમાં ડૂબી ગયા છે. હાલ રાજ્યમાં બિનસચિવાયલ ક્લાર્ક, હેડ ક્લાર્ક, કોન્સ્ટેબલ, જુનિયર ક્લાર્કની ભરતી ચાલી રહી છે. રાજ્યમાં ઘણાં એવા યુવાનો છે કે જેઓ છેલ્લાં ઘણાં વર્ષોથી સરકારી નોકરી મેળવવા માટેની વિવિધ સ્પર્ધાત્મક પરીક્ષાઓની તૈયારી કરી રહ્યા છે પરંતુ, કોરોનાની મહામારીમાં આ પરીક્ષાઓની તારીખ લંબાતા વિદ્યાર્થીઓની ચિંતામાં પણ વધારો થયો છે.

2020-2021ના બે વર્ષ તો જાણે આંખના પલકારામાં પસાર થઈ ગયા

ગુજરાતમાં સરકારી નોકરી મેળવવા માટે છેલ્લાં કેટલાંક વર્ષોથી સ્પર્ધાત્મક પરીક્ષાની તૈયારી કરતો મેહુલ નામનો અમદાવાદી યુવક જણાવે છે કે કોમર્સમાં ગ્રેજ્યુએશન (B.Com) કર્યા પછી મેં થોડા વર્ષો પ્રાઈવેટ નોકરી કરી પરંતુ ત્યાં પગાર નહીં વધતા અને શોષણ વધારે હોવાથી સરકારી નોકરીની તૈયારી શરૂ કરી. જ્યારે સ્પર્ધાત્મક પરીક્ષાની તૈયારી શરૂ કરી ત્યારે શરૂઆતમાં એક વર્ષ કોચિંગ લીધું અને ત્યારબાદ ઘર નજીકની રીડિંગ લાઈબ્રેરીમાં જઈને દરરોજનું 9થી 10 કલાકનું વાંચન શરૂ કર્યું. દરમિયાન કોરોના વાયરસની મહામારી આવતા સરકારી ભરતીઓ લંબાઈ અને 2020-2021ના બે વર્ષ તો જાણે આંખના પલકારામાં પસાર થઈ ગયા.

સરકારી નોકરી નહીં મળે તો પ્રાઈવેટમાં પણ પરત ફરવું અઘરું થઈ જશે

અત્યારે સ્થિતિ કંઈક એવી છે કે મારી ઉંમર 28 વર્ષ થઈ ગઈ છે અને સરકારી નોકરીની રાહ જોવામાં વધુ વર્ષો આપી શકું તેમ નથી કારણકે ઘરની આર્થિક સ્થિતિ મજબૂત નથી. કોરોનાની મહામારીના કારણે ઘરની આર્થિક સ્થિતિ પર અસર પડી છે તેમજ હવે મારા 28 વર્ષ થઈ જતાં નોકરીની સાથે-સાથે લગ્નનું પણ દબાણ છે. મેં જ્યારે સ્પર્ધાત્મક પરીક્ષાની તૈયારી શરૂ કરી ત્યારે ભરતી માટે જેટલાં ફોર્મ ભરાતા હતા તેના કરતા અત્યારે સરકારી ભરતી માટે ભરાતા ફોર્મનો આંકડો ડબલ થઈ ગયો છે! જો આગામી સમયમાં આયોજિત સરકારી ભરતીમાં નોકરી નહીં મળે તો પ્રાઈવેટમાં પણ પરત ફરવું અઘરું થઈ જશે કારણકે મારી પાસે અનુભવ નથી, તેમજ માતા-પિતાના સપના ઉપર પણ પાણી ફરી વળશે. સાથે જ સમાજ અને મિત્રોને પણ જવાબ આપવો ભારે પડી જશે.

સરકારી ભરતીઓ લંબાતા તૈયારીનો સમયગાળો વધી ગયો

સૌરાષ્ટ્રના નાના શહેરમાં રહેતી અને સરકારી પરીક્ષાની તૈયારી કરતી જ્યોતિ નામની યુવતી જણાવે છે કે ગ્રેજ્યુએશન પૂરું કર્યા પછી સરકારી નોકરી મેળવવાના સપના જોતાં હું સ્પર્ધાત્મક પરીક્ષાની તૈયારી કરવા માટે ગાંધીનગર આવી ગઈ હતી જ્યાં મેં કોચિંગ ક્લાસ જોઈન કર્યા અને અન્ય યુવતીઓ સાથે ભાડાના મકાનમાં રહેતા દિવસ-રાત વાંચવાનું શરૂ કર્યું. પરંતુ, કોરોના વાયરસની મહામારીના કારણે ગાંધીનગર છોડીને વતન પાછા ફરવું પડ્યું. છેલ્લાં 2 વર્ષ દરમિયાન કેટલીક સરકારી ભરતીઓ લંબાતા તૈયારીનો સમયગાળો વધી ગયો. ઘરે માતા-પિતાને એવી આશા છે કે દીકરીને સરકારી નોકરી મળતાં જ સારો છોકરો શોધીને લગ્નની વાત કરીએ.

ઘરેથી જલદી સરકારી નોકરી મેળવવાનું દબાણ હોવાથી હું ઘણીવખત તણાવ અનુભવું છું

મારી ઉંમર અત્યારે 25 વર્ષ થઈ ગઈ છે, હવે સરકારી નોકરીની તૈયારી કરતા નવા વિદ્યાર્થીઓની ઉંમર મારા કરતા 5 વર્ષ નાની છે અને તેઓ પાસે પૂરતો સમય છે. હું સરકારી નોકરી મેળવવા માટે દિવસ-રાત મહેનત કરું છું પણ અહીં એક-એક માર્ક વચ્ચે મોટી સ્પર્ધા રહેલી છે. છેલ્લાં મહિનાઓમાં બહાર પડેલી સરકારી ભરતીઓમાં લાખો ફોર્મ્સ ભરાયા છે. ઘરેથી પણ જલદી સરકારી નોકરી મેળવવાનું દબાણ હોવાથી હું ઘણીવખત તણાવ અનુભવું છું ત્યારે પ્રેરણાત્મક વિડીયો અને લેખો વાંચીને પોતાને હિંમત આપું છું. સરકારી નોકરી માટે તૈયારી કરતા યુવક-યુવતીઓને મારે એટલું જ કહેવું છે કે હંમેશાં મગજમાં બીજો પ્લાન તૈયાર રાખજો. જો સરકારી નોકરી ના મળે તો બીજા કોઈ ક્ષેત્રમાં સારા પૈસા મળી રહે તેવું પ્લાનિંગ કરવું.

સરકારી નોકરી મેળવવા માટેની સ્પર્ધાત્મક પરીક્ષાની તૈયારી કરતા ઉમેદવારની સાથે-સાથે તેનો પરિવાર અને ભવિષ્યના પ્લાન પણ જોડાયેલા હોય છે. એક કરતા વધુ વર્ષો સુધી તૈયારી કરતા ઉમેદવારને લગ્નનું દબાણ, કમાણીના સ્ત્રોત, પ્રાઈવેટ નોકરી અથવા બિઝનેસમાં પરત ફરીશું તો શું કરીશું? જેવા પ્રશ્નો સામે પણ સતત લડતા રહેવું પડે છે. જ્યારે પરીક્ષા રદ થાય ત્યારે ઉમેદવારોના સપના તૂટતા હોય છે. જેટલા વર્ષો તૈયારીમાં પસાર થાય ત્યાં સુધીમાં નવા ગ્રેજ્યુએટ થયેલા ઉમેદવારો પણ મેદાનમાં હોય છે અને સામે મોંઘવારી પણ વધતી જાય છે. અંતે તો જે સરકારી નોકરી મેળવે તેને જ માન મળે છે.

Source link