ગુજરાતમાં અન્ય રાજ્યો કરતા કોરોનાની ત્રીજી લહેરનો ઝડપી અંત આવ્યો!

 

અમદાવાદઃ ગુજરાતમાં 20 જાન્યુઆરીએ કોરોનાની ત્રીજી લહેર કોરોનાના 24,485 દૈનિક કેસ સાથે પીક પર પહોંચી ગઈ હતી. બે મહિના પછી શુક્રવારે આંકડો 18 પર પહોંચી ગયો છે, દૈનિક કેસોમાં 1,360 ગણો ઘટાડો નોંધાયો છે. અન્ય રાજ્યોની સરખામણીમાં ગુજરાતમાં ઝડપથી ઘટાડો નોંધાયો છે.

ગુજરાતમાં દૈનિક કેસમાં ઘટાડો થયો તે સમય દરમિયાન મહારાષ્ટ્રમાં 269 ગણો ઘટાડો નોંધાયો અને રાજસ્થાનમા તથા મધ્યપ્રદેશમાં તે ઘટાડો 247 ગણો અને 303 ગણો હતો.

રાજ્યમાં 10 ગણો ઘટાડો થતા 19 દિવસનો સમય લાગ્યો, આ પછી અન્ય 18 દિવસ દરમિયાન ઘટાડો 162થી 1,646નો થયો, આમ રાજ્યના કેસમાં ઝડપથી ઘટાડો થતો ગયો. વર્ષની શરુઆતમાં 39 દિવસમાં (9 ફેબ્રુઆરી સુધી) 598 દર્દીઓના મોત થયા હતા, જે પછીના 39 દિવસમાં 223 મોત નોંધાયા હતા, એટલે કે 37% ઘટાડો થયો હતો.

બે વર્ષ પહેલા 19 માર્ચે રાજકોટ અને સુરતમાં બે કેસ કોરોના પોઝિટિવ કેસ નોંધાયા હતા, આમ ગુજરાતમાં કોરોનાની એન્ટ્રી થઈ હતી. આ પછી રાજ્યમાં કુલ 12.2 લાખ કોરોનાના કેસ નોંધાયા અને ‘સત્તાવાર’ આંકડા પ્રમાણે લગભગ 11,000 મોત નોંધાયા.

હવે એશિયાના કેટલાક દેશોમાં ઓમિક્રોન વેરિયન્ટના લીધે કોરોનાના કેસમાં વધારો થઈ રહ્યો છે, આ વધતા કેસોને ધ્યાનમાં રાખીને કેન્દ્રીય સ્વાસ્થ્ય મંત્રાલય દ્વારા મહત્વની બેઠક યોજવામાં આવી હતી. સ્વાસ્થ્ય મંત્રી મનસુખ માંડવિયા દ્વારા રાજ્યોને સચેત રહેવા માટે જણાવ્યું છે. આરોગ્ય વિભાગના મુખ્ય અધિક સચિવ મનોજ અગ્રવાલે અમારા સહયોગી ટાઈમ્સ ઓફ ઈન્ડિયા સાથે કરેલી વાતચીતમાં ટેસ્ટ-ટ્રેક-ટ્રીટ મોડલના આધારે કામ કરવા અંગે જણાવ્યું છે. તેમણે કહ્યું છે કે, “રાજ્યમાં હાલ દૈનિક કેસનો આંકડો ઘણો જ નીચો હોવાથી સરકાર દ્વારા કોઈ મહત્વની સૂચના આપવામાં આવી નથી. પરંતુ અમે વધારે લોકોના ટેસ્ટ અને તપાસ થાય તેના પર ધ્યાન કેન્દ્રીત કરીશું.”

IIPH-Gના ડિરેક્ટર દિલીપ માવળંકરે જણાવ્યું કે, “ગુજરાત સહિત ભારતમાં ત્રીજી લહેર દરમિયાન કેસમાં વધારો થયો હતો. વધારે કેસની સંખ્યાના કારણે હર્ડ ઈમ્યુનિટી અને સારા વેક્સિનેશન કવરેજના લીધે ગુજરાતને ફાયદો થશે.” તેમણે કહ્યું કે, “મને લાગતું નથી કે રાજ્યમાં કોઈ કપરી સ્થિતિ ઉભી થઈ શક છે, પરંતુ હંમેશા કપરી સ્થિતિ ઉભી થાય તો તેની સામે લડવા માટે તૈયાર રહેવું જોઈએ. આ માટે હજુ થોડો સમય આપણે કોવિડ ગાઈડલાઈન્સનું પાલન કરવું જોઈએ.”

Source link