કોંગ્રેસમાં વિવાદઃ કપિલ સિબ્બલે કહ્યું-‘રાહુલ અને સોનિયા ગાંધી પદ છોડે’, અન્ય નેતાઓએ કાઢી ઝાટકણી!

 

નવી દિલ્હીઃ પાંચ રાજ્યોમાં વિધાનસભા ચૂંટણી (Assembly Election Results 2022)માં કોંગ્રેસને કારમી હાર મળ્યા બાદ મંથનનો સિલસિલો ચાલુ છે. તો બીજી તરફ પાર્ટીની અંદર આંતરિક કલેહ પણ શરૂ થઈ ગયો છે. આ વખતે આંતરિક કલેહનું કારણ કોંગ્રેસના વરિષ્ઠ નેતા કપિલ સિબ્બલનું નિવેદન છે. જે બાદ ગાંધી પરિવારના નેતૃત્વમાં વિશ્વાસ રાખવનારા નેતાઓએ તેમના પર આકરા પ્રહાર કર્યા છે. એ નેતાઓએ આરોપ લગાવતા કહ્યું કે, કપિલ સિબ્બલ રાષ્ટ્રીય સ્વ્યંસેવક સંઘ (Rashtriya Swayamsevak Sangh) અને ભાજપની ભાષા બોલી રહ્યા છે.

કપિલ સિબ્બલે એવું તો શું નિવેદન આપ્યું?
કોંગ્રેસ પાર્ટીના વરિષ્ઠ નેતા કપિલ સિલ્બલે એક અંગ્રેજી અખબારને આપેલા ઈન્ટરવ્યૂમાં કહ્યું કે, ગાંધી પરિવારે કોંગ્રેસ પાર્ટીના નેતૃત્વથી અલગ થઈ જવુ જોઈએ અને કોઈ અન્યને તક આપવી જોઈએ. તેઓ ઘરની કોંગ્રેસ નહીં પણ તમામની કોંગ્રેસ ઈચ્છે છે. કપિલ સિબ્બલે આગળ કહ્યું કે, હું સૌની કોંગ્રેસ માટે છેલ્લાં શ્વાસ સુધી લડીશ. કપિલ સિબ્બલે પોતાના ઈન્ટરવ્યૂમાં એવું પણ કહ્યું કે, 2014 બાદ અત્યાર સુધી 177 સાંસદ, ધારાસભ્ય અને 222 ઉમેદવારોએ કોંગ્રેસ પાર્ટી છોડી દીધી છે. કોઈ પણ પાર્ટીએ આટલું મોટુ પલાયન જોયુ નથી. રાહુલ ગાંધી (Rahul Gandhi) અધ્યક્ષ પર ન હોવા છતા પણ અધ્યક્ષ છે. જે તમામ નિર્ણય લે છે. તેઓએ સીડબલ્યુસી (CWC Meeting)નો ઉલ્લેખ કરતા કહ્યું કે, ગાંધી પરિવારે સ્વેચ્છાથી દૂર જવું જોઈએ કારણ કે તેમના દ્વારા નામાંકિત એકમ તેમને ક્યારેય કહેશે નહીં કે પાર્ટી કમાન ન સંભાળવી જોઈએ.

સંઘ અને ભાજપની ભાષા બોલી રહ્યા છે સિબ્બલ
મણિકમ ટાગોરે કપિલ સિબ્બલની ટિપ્પણીને લઈને તેમના પર નિશાન સાધતા ટ્વિટ કર્યુ કે, આરએસએસ અને ભાજપ કેમ ઈચ્છે છે કે નહેરુ-ગાંધી નેતૃત્વ અલગ થઈ જાય. કારણ કે ગાંધી પરિવારના નેતૃત્વ વગર કોંગ્રેસ જનતા પાર્ટી બની જશે. આ રીતે કોંગ્રેસને ખતમ કરવી સરળ રહેશે અને ફરીથી આઈડિયા ઓફ ઈન્ડિયાને ખતમ કરવું સરળ હશે. કપિસ સિબ્બલ એ જાણે છે કે પરંતુ તેઓ આરએસએસ-ભાજપની ભાષા કેમ બોલી રહ્યા છે.

નિવેદનબાજી કરવા કરતા અધ્યક્ષ પદની ચૂંટણી લડે
કોંગ્રેસ પ્રવક્તા પવન ખેડાએ કપિલ સિબ્બલ પર પ્રહાર કરતા કહ્યું કે, આવા નેતાઓએ પાર્ટીના નેતૃત્વ વિરૂદ્ધ નિવેદનબાજી કરવાા બદલે અધ્યશ્ર પદની ચૂંટણી લડવી જોઈએ. કપિલ સિબ્બલ, ડોક્ટર હર્ષવર્ધને તમને નહોતુ કહ્યું કે ચાંદની ચોકથી અલગ થઈ જાવ. તેઓ ચૂંટણી લડ્યા અને તમને હરાવ્યા. જે લોકો કોંગ્રેસનું નેતૃત્વ કરવા માગે છે તેઓ હાલના નેતૃત્વ વિરુદ્ધ રોજ બોલવાના બદલે પાર્ટીના અધ્યક્ષ પદની ચૂંટણી લડવા માટે સ્વતંત્ર છે.

સીએમ અશોક ગેહલોતે શીખવાડ્યા એબીસીડીના પાઠ

કપિલ સિબ્બલના નિવેદન બાદ રાજસ્થાનના સીએમ અશોક ગેહલોતે પણ તેમને આડા હાથ લીધા છે. તેઓએ કપિલ સિબ્બલના નિવેદન પર આકરી ટિકા કરતા કહ્યું કે, કપિલ સિબ્બલ એ વ્યક્તિ નથી કે જેઓ કોંગ્રેસની સંસ્કૃતિમાંથી આવતા હોય. તેઓ એક જાણીતા વકીલ છે, જેઓએ કોંગ્રેસમાં પ્રવેશ કર્યો છે. સોનિયા ગાંધી અને રાહુલ ગાંધી તેમને અનેક તકો આપી છે. કપિલ સિબ્બલ જેવી વ્યક્તિ પાસે આવી આશા ન રાખી શકાય કે જેઓ કોંગ્રેસની એબીસી પણ જાણતા ન હોય.

ગાંધી પરિવાર કોંગ્રેસનો પ્રાણવાયુઃ રાગિણી નાયક
કોંગ્રેસ પ્રવક્તા રાગિણી નાયકે કહ્યું કે, ગાંધી પરિવાર કોંગ્રેસનો પ્રાણવાયુ છે. ગાંધી પરિવારે પોતાના સંઘર્ષ અને લોહીથી દેશને બનાવ્યો છે અને નૈતિક મૂલ્યોને આગળ વધાર્યા છે. કોંગ્રેસનો દરેક કાર્યકર્તા ગાંધી પરિવારના નેતૃત્વમાં પોતાને મજબૂત માને છે.

મહત્વનું છે કે, કોંગ્રેસે જી 23 સમૂહ (G23 Group)ના સભ્ય કપિલ સિબ્બલે આ ટિપ્પણી કોંગ્રેસ કાર્ય સમિતિની બેઠકના બે દિવસ બાદ કરી છે. સીડબલ્યુસીની બેઠકમાં કોંગ્રેસ નેતાઓએ સોનિયા ગાંધીના નેતૃત્વમાં વિશ્વાસ રાખતા કહ્યું હતું કે, તેઓ સંગઠનાત્મક ચૂંટણી પૂરી થાય ત્યાં સુધી પદ પર રહે અને પાર્ટીને મજબૂત બનાવવા માટે જરૂરી પગલા લે.

Source link