કરોડોની જમીનના મામલામાં ફસાયેલા પાટીદાર આગેવાન મહેન્દ્ર ફળદુને કેમ આપઘાત કરવો પડ્યો?

 

રાજકોટ: કડવા પાટીદાર સમુદાયના આગેવાન મહેન્દ્ર ફળદુએ આપઘાત કરી લેતા સમગ્ર સૌરાષ્ટ્રમાં ચકચાર મચી ગઈ છે. પોતે કાયદાનું સંપૂર્ણ જ્ઞાન ધરાવતા હોવા છતાં મહેન્દ્ર ફળદુએ આખરે પોતાની સાથે એવું તો શું થયું કે તેમને મોત વ્હાલું કરવું પડ્યું તે અંગે જીવન ટૂંકાવતા પહેલા મીડિયાને સંબોધીને એક પત્ર લખ્યો હતો. જેમાં તેમણે જણાવ્યું છે કે રાજકોટના બિલ્ડર એમ.એમ. પટેલ, અમિત ચૌહાણ, અતુલ મહેતા તેમજ અમદાવાદના ઓઝોન ગ્રુપના જયેશ પટેલ, દીપક પટેલ, પ્રકાશ પટેલ, પ્રણય પટેલની સાથે મળી તેઓ અમદાવાદ જિલ્લાના બાવળા તાલુકામાં આવેલા બલદાણા ગામની હદમાં પાંચેક લાખ વાર જેટલી જગ્યામાં ‘ધ તસ્કની બીચ સિટી’ નામનો પ્રોજેક્ટ બનાવી રહ્યા હતા. જેમાં મહેન્દ્ર ફળદુએ પોતાના તેમજ પોતાના સગાવ્હાલાના નામે 2007માં આશરે 48,000 ચોરસ વાર જેટલી જમીન બુક કરાવી હતી, અને તેનું ત્રણ કરોડ રુપિયાથી પણ વધુ પેમેન્ટ પણ કંપનીમાં 2007માં જ જમા કરાવી દીધું હતું.

જોકે, આ બાબતે કંપની તેમજ તેના ભાગીદારો સાથે તેમને ઘણા સમયથી વિવાદ ચાલતો હતો. તેમના જે સંબંધીઓએ રુપિયા આપી જમીન બુક કરાવી હતી તેમાં મહેન્દ્ર ફળદુ મધ્યસ્થી તરીકે રહ્યા હતા. જમીનના દસ્તાવેજ ના થતાં તેમણે રોકાણકારોને યોગ્ય રકમ મળી રહે તે માટે પ્રયાસ કર્યા હતા. તેમણે કંપનીના ડિરેક્ટરોને દસ્તાવેજો કરી આપવા માટે પણ વિનંતીઓ કરી હતી. જોકે, તેમાં ફળદુને સફળતા નહોતી મળી. બીજી તરફ, પત્રમાં કરાયેલા આક્ષેપ પ્રમાણે કંપનીના ડિરેક્ટરો સમાધાન કરી લેવાને બદલે મહેન્દ્ર ફળદુને ધમકીઓ આપતા હતા. એટલું જ નહીં, તેમના પર ખોટા કારણો ઉભા કરી ફરિયાદો પણ કરવામાં આવી હતી.

જ્યારે પણ મહેન્દ્ર ફળદુ દસ્તાવેજ કરી આપવાની વાતો કરતા ત્યારે કંપનીના ડિરેક્ટરો તેમને મંત્રીઓ અને ઉચ્ચ અધિકારીઓ સાથે સીધા સંબંધો છે તેવું કહીને તેમને સતત ધમકાવતા હતા. બીજી તરફ, દસ્તાવેજ ના કરી આપવા પડે તે માટે તેઓ ફળદુને શારીરિક તેમજ માનસિક ત્રાસ પણ આપતા હતા. આ સ્થિતિમાં તેમણે વચ્ચે રહીને જે સોદા કરાવ્યા હતા તેવા લોકોની ફસાયેલી રકમ કઢાવી આપવાનું તેમના માટે ખૂબ જ મુશ્કેલ થઈ ગયું હતું. મોટી રકમ સલવાઈ જતાં તેમજ પોતાના ભરોસે રોકાણ કરનારા બીજા લોકોના રુપિયા પણ સલવાતા મહેન્દ્ર ફળદુની આર્થિક સ્થિતિ કથળી હતી. આ ઉપરાંત, રોકાણ કરનારા ત્રણ-ચાર લોકોનું અવસાન થયા બાદ પણ તેમને કંપની દ્વારા કોઈ રુપિયા ના મળતા તેમના પરિવારજનો ફળદુ પાસે ઉઘરાણી કરતા હતા.

એક તરફ પોતાના રુપિયા કંપનીમાં ફસાઈ જતાં અને બીજી તરફ, રોકાણકારો પણ સતત ઉઘરાણી કરતા હોવાથી મહેન્દ્ર ફળદુને ઓફિસે જવા-આવવા તેમજ સામાજિક પ્રસંગોમાં ભાગ લેવાનું પણ મુશ્કેલ થઈ ગયું હતું. જેના કારણે તેઓ માનસિક તાણ અનુભવતા હતા. વર્ષો બાદ પણ આ મામલાનો કોઈ ઉકેલ ના આવતા આખરે આજે મહેન્દ્ર ફળદુએ જીવનનો અંત આણ્યો હતો. ઉલ્લેખનીય છે કે, તેઓ ક્લબ યુવીના સ્થાપક અને એમડી હતા. સરદારધામના ટ્રસ્ટી તેમજ સૌરાષ્ટ્ર ઝોનના સેક્રેટરી તરીકે પણ તેઓ કાર્યરત હતા.

Source link