આજે બિનસચિવાલય કલાર્કની પરીક્ષા, 32 જિલ્લાના 3243 કેન્દ્રો પર કરાયું આયોજન!

 

અમદાવાદ: ગુજરાતમાં જડબેસલાક પોલીસ બંદોબસ્ત વચ્ચે બિન સચિવાલય કલાર્ક-સચિવાલય ઓફિસ આસિસ્ટન્ટની પરીક્ષા યોજાઈ છે. અગાઉ આ પરીક્ષાના પેપર લીક થઈ ગયા હોવાથી આ વખતે પહેલી વખત સેન્ટ્રલ સ્ટ્રોંગ રૂમમાંથી જિલ્લાના સ્ટ્રોંગ રૂમમાં પ્રશ્નપત્ર મોકલવાની પદ્ધતિ અમલમાં મૂકાઈ છે. તે ઉપરાંત પરીક્ષાલક્ષી કામગીરી સાથે સંકળાયેલા તમામ કર્મચારીઓને પણ કેન્દ્રમાં મોબાઈલ લઈ જવા દેવામાં આવ્યા નથી. એટલું જ નહીં. કેન્દ્રમાં પ્રવેશ આપવા જતા તમામ ઉમેદવારોની પરીક્ષા કેન્દ્રની બહાર જ સંપૂર્ણ તપાસ કરવામાં આવ્યા બાદ જ પ્રવેશ અપાયો છે.

ગૌણ સેવા પસંદગી મંડળની બિન સચિવાલય કલાર્કની પરીક્ષા શાંતિપૂર્ણ અને ગેરરીતિ વિના યોજાય તે સરકાર માટે પ્રતિષ્ઠાનો પ્રશ્ન બન્યો છે. કારણ કે, પૂર્વ ચેરમેન એસિત વોરાને રાજીનામું આપવાની અને પરીક્ષા રદ કરવા કરવાની ફરજ પડેલી છે. તે સંજોગોમાં 3600 જગ્યા માટેની આજની પરીક્ષા અંગે સંપૂર્ણ તૈયારી કરાઈ હોવા અંગેની વિગતો આપતા ઈન્ચાર્જ ચેરમેન એ કે રાકેશના જણાવ્યા અનુસાર ચૂસ્ત સલામતી વ્યવસ્થા વચ્ચે રાજ્યના 32 જિલ્લાના 3243 પરીક્ષા કેન્દ્રો પર આયોજન વ્યવસ્થા ગોઠવાઈ છે.

ઉલ્લેખનીય છે કે, 10.45 લાખ જેટલા ઉમેદવારોએ આ ભરતી માટે અરજી કરી હતી અને 6 લાખ જેટલા ઉમેદવારો દ્વારા કોલ લેટર ડાઉનલોડ કરવામાં આવ્યા છે. પરીક્ષા કેન્દ્રો ઉપર પેપર પહોંચાડવાની પદ્ધતિ પણ વખુ ફૂલપ્રુફ બનાવવા ગાંધીનગરના સેન્ટ્રલ સ્ટ્રોંગ રૂમમાંથી જિલ્લાના સ્ટ્રોંગ રૂમમાં પેપર પહોંચાડ્યા છે. પરીક્ષાનું પેપર લીક ન થાય તે માટે પરીક્ષાની કામગીરી સાથે જોડાયેલા કર્મચારીઓને મોબાઈલ લઈ જવા પર પ્રતિબંધ મૂકાયો છે. બીજી તરફ ઉમેદવારો સરળતાથી પરીક્ષા આપવા જઈ શકે તે માટે એસટીની એક્સ્ટ્રા બસોની પણ વ્યવસ્થા કરવામાં આવી છે.

Source link