અમદાવાદીઓ બહાર નીકળતા પહેલા વિચારજો, આજે ગરમીનો પારો 42 ડિગ્રી સુધી પહોંચી શકે

અમદાવાદ: ઉનાળો શરૂ થતાં છેલ્લા એક અઠવાડિયાથી ગરમીનો પારો સતત વધી રહ્યો છે. કાળઝાળ ગરમી દરમિયાન અમદાવાદ, ગાંધીનગર, ખેડા, બનાસકાંઠા, સાબરકાંઠા, પાટણ, રાજકોટ, અમરેલી, ભાવનગર, સુરેન્દ્રનગર અને કચ્છ જિલ્લાના અલગ-અલગ વિસ્તારમાં આજે હીટવેવની હવામાન વિભાગ દ્વારા આગાહી કરવામાં આવી છે. આ કારણથી હવામન વિભાગે લોકોને કામ વગર ઘરેથી બહાર જવાનું ટાળવાની સલાહ આપી છે. જેથી લોકો બહાર નીકળતા પહેલા આ વાતનું ખાસ ધ્યાન રાખજો. કારણે કે, વધારે પડતી ગરમીના કારણે તેઓ ડિહાઈડ્રેશન તેમજ સ્ટ્રોકનો શિકાર પણ બની શકે છે.

ભારતીય હવામાન વિભાગની આગાહી મુજબ અમદાવાદ શહેર અને જિલ્લાને વધુ બે દિવસ હીટવેવનો સામનો કરવો પડશે અને દૈનિક તાપમાન 40 ડિગ્રી સેલ્સિયસને પાર કરે તેવી શક્યતા છે. બુધવારે, મહત્તમ તાપમાન લગભગ 42 ડિગ્રી રહેવાની સંભાવના છે તેવો આગાહીમાં ઉલ્લેખ કરવામાં આવ્યો છે.

આગાહી અનુસાર આગામી 2-3 દિવસ દરમિયાન મહત્તમ તાપમાનમાં કોઈ મોટો ફેરફાર નહીં થાય, ત્યારબાદ આગામી 2 દિવસ દરમિયાન ધીમે ધીમે 2-3 ડિગ્રીનો ઘટાડો થવાની સંભાવના છે. અમદાવાદમાં પણ લઘુત્તમ તાપમાન વધીને 21.8 ડિગ્રી થયું હતું, જે બુધવારે 22 ડિગ્રીને સ્પર્શે તેવી શક્યતા છે.

અમદાવાદમાં ચાલુ વર્ષે પારો 40 ડિગ્રીએ વહેલો પહોંચ્યો, બે દિવસ યલો-ઓરેન્જ

મહત્તમ તાપમાન સામાન્ય કરતા 6 ડિગ્રી જેટલું વધ્યું
સોમવારે 40.2 ડિગ્રી સેલ્સિયસની સામે મંગળવારે અમદાવાદમાં ગરમીનો પારો 41.5 ડિગ્રીને સ્પર્શ્યો હતો, જે સુરેન્દ્રનગરમાં 41.7 ડિગ્રી પછી ગુજરાતમાં બીજા ક્રમે સૌથી વધારે હતો. થોડા દિવસો પહેલા તાપમાન 35-36 વચ્ચે નોંધાતું હતું જેની સામે હવે મહત્તમ તાપમાન સામાન્ય કરતાં 5.9 ડિગ્રી વધુ છે.

ઉલ્લેખનીય છે કે, મંગળવારે ગુજરાતના 28માંથી 10 હવામાન મથકોએ મહત્તમ તાપમાન 40 ડિગ્રી કે તેથી વધુ નોંધાયું હતું. રાજ્યના પાટનગર ગાંધીનગરમાં પણ મહત્તમ તાપમાન 41 ડિગ્રી નોંધાયું હતું અને બપોરના સમયે મુસાફરોને ગરમીનો સામનો કરવો પડ્યો હતો.

Source link