અમદાવાદમાં સુરત જેવી ઘટના, પોલીસ સ્ટેશન નજીક જ પ્રેમીએ પ્રેમિકાને જાહેરમાં રહેંસી નાખી!

 

અમદાવાદ: આંતરાષ્ટ્રીય મહિલા દિવસે જ અમદાવાદમાં સુરતના ગીષ્મા હત્યા કેસ જેવી ઘટના બનતા ચકચાર મચી છે. ચોંકાવનારી વાત તો એ છે કે, પોલીસ સ્ટેશનની નજીક જ આ ઘટના બની છે. શહેરના માધુપુરા વિસ્તારમાં એક પ્રમીએ જાહેરમાં જ પ્રેમિકાને છરીથી રહેંસી (Man killed girlfriend) નાખી ફરાર થઈ ગયો હતો. આ ઘટનાના સીસીટીવી ફૂટેજ સોશિયલ મીડિયા પર ફરતા થયા છે. હાલ તો હત્યારાને પોલીસે ઝડપી લીધો છે અને વધુ કાર્યવાહી હાથ ધરી છે, પરંતુ ભરબજારમાં બનેલી આ ઘટનાએ શહેરની કાયદો અને વ્યવસ્થાની સ્થિતિ સામે ઘણા સવાલો ઊભા કર્યા છે. સુરતમાં ગ્રીષ્મા વેકરિયાની હત્યા થઈ હતી એ જ રીતે આ હત્યા કરવામાં આવી હતી. સુરતની ઘટના બાદ મહિલાઓની સલામતી માટે ઘણી વાતો કરવામાં આવી હતી, પરંતુ અમદાવાદમાં (Ahmedabad news) બનેલી આ ઘટનાએ ફરી એક વખત આ બધી વાતોને પોકળ સાબિત કરી દીધી છે.

માધુપુરા વિસ્તારમાં આવેલા કાજીમીયાના ટેકરા ખાતે રહેતા અને છૂટક મજૂરી કરતા ભરતભાઈ માનસિંગભાઈ બોડાણાએ આ મામલે માધુપુરા પોલીસ સ્ટેશનમાં ફરિયાદ નોંધાવી છે. પોલીસ ફરિયાદ મુજબ, ભરતભાઈની 35 વર્ષીય પત્ની આશાબેન મહેંદીકુવા પાસે આવેલા પાણીના પ્લાન્ટમાં છૂટક મજૂરી કરતા હતા. તેઓને સંતાનમાં એક દીકરી અને એક દીકરો છે. ભરતભાઈની ફરિયાદ મુજબ, તેમની પત્ની આશાબેનના ડામરવાળી ચાલીમાં રહેતા નવીન મગનભાઈ રાઠોડ સાથે પ્રેમ સંબંધ હતા. તેમની પત્ની નવીન સાથે પ્રેમ સંબંધ રાખવા માગતા નહોતી. જેથી આરોપી નવીન અવારનવાર તેમની પત્ની સાથે બોલવાનો પ્રયાસ કરતો હતો.

આજે સાંજે પાંચેક વાગ્યાના સુમારે જોગણીમાતાના ડહેલા પાસે આવેલા હનુમાન મંદિર નજીક ઉશ્કેરાયેલા આરોપી નવીને આશાબેનને જાહેરમાં જ છરીના ઉપરા છાપરી ઘા ઝીંકી દીધા હતા. જે બાદ આશાબેનનું કરૂણ મોત નીપજ્યું હતું. પ્રેમિકાને મોતને ઘાટ ઉતારીને આરોપી નવીન ઘટના સ્થળેથી ફરાર થઈ ગયો હતો. આ ઘટના માધુપુરા પોલીસ સ્ટેશનની નજીક જ બની હતી. ઘટનાના પગલે આસપાસના લોકો દોડી આવ્યા હતા. બાદમાં જાણ થતા પોલીસ પણ ઘટના સ્થળે પહોંચી હતી. પોલીસે મૃતદેહને પોસ્ટમોર્ટમ માટે સિવિલ હોસ્પિટલ ખસેડ્યો હતો. માધુપુરા પોલીસ સ્ટેશનના પી.આઈ. આર.ટી.ઉદાવતે જણાવ્યું કે, ઘટનાની જાણ થતા પોલીસે આ મામલે આગળની કાર્યવાહી હાથ ધરીને આરોપી નવીનને ટૂંક જ સમયમાં ઝડપી પાડ્યો હતો. પોલીસે આ મામલે આગળની કાર્યવાહી હાથ ધરી છે.

Source link