અમદાવાદઃ CNGના ભાવ વધારા સામે રિક્ષાચાલકોની હડતાળ, ગાંધીનગર સુધી રેલીની ચિમકી

 

અમદાવાદઃ સતત CNGના ભાવમાં વધારો થતા રિક્ષા ચાલકો હડતાળ પર ઉતરી ગયા છે. રિક્ષાચાલકો દ્વારા આગામી સમયમાં ગેસના ભાવને લઈને કોઈ નિર્ણય નહીં લેવાય તો ઉગ્ર વિરોધ નોંધાવવાની ગર્ભિત ચિમકી ઉચ્ચરવામાં આવી છે. અમદાવાદના રિક્ષાચાલકોની હડતાળમાં 10 જેટલા યુનિયન જોડાયા છે. ગુજરાત રિક્ષાચાલક ફેડરેશન આ હડતાળમાં જોડાયું નથી અને ફેડરેશન દ્વારા રિક્ષાઓ ચાલુ રાખીને પણ વિરોધ વ્યક્ત કરી શકાય તેવી દલીલ કરી છે. જોકે, રિક્ષાચાલક યુનિયનોમાં હડતાળને લઈને મતમતાંતર છે જેમાં એક યુનિયને રિક્ષા ચાલુ રાખીને પણ સીએનજીના ભાવ વધારા સામે વિરોધ નોંધાવી શકાય છે તેવી દલીલ કરી છે.

15મી એપ્રિલે અમદાવાદ શહેરના રિક્ષાચાલકો એક દિવસની સ્વયંભૂ પ્રતિક હડતાળ પર ઉતર્યા છે. જેમાં તેમના દ્વારા પાંચ જેટલી માંગ કરવામાં આવી છે. તેમાં સીએનજીનો ભાવ વધારો પાછો ખેચવાની સાથે સીએનજીને જીએસટીમાં લાવવાની, રિક્ષાચાલકોને સીએનજીમાં સબસીડી આપવાની, રિક્ષાના ભાડામાં વધારો કરવાની અને રિક્ષાચાલકો પર થતા પોલીસના દમનને બંધ કરવાની માંગ કરવામાં આવી છે. આ માંગ સ્વીકારવામાં નહીં આવે તો આગામી દિવસમાં ઉગ્ર આંદોલનની ચિંમકિ ઉચ્ચારવામાં આવી છે.

રિક્ષાચાલક વેલફેર એસોસિએશનના કારોબારીએ જણાવ્યું કે જો સીએનજીના ભાવ વધારા પર નિરાકરણ નહીં આવે તો અમે ગાંધીનગર જઈને વિરોધ નોંધાવીશું, અને તે પછી પણ વિરોધ યથાવત રાખીશું. આ હડતાળમાં 10 જેટલા યુનિયન જોડાયા છે જ્યારે ગુજરાત રાજ્ય ઓટોરિક્ષા ફેડરેશન દ્વારા હડતાળમાં જોડાવાનો ઈનકાર કરી દીધો છે.

ગુજરાત રાજ્ય ઓટોરિક્ષા ફેડરેશનના પ્રમુખ જયંતિ પ્રજાપતિએ જણાવ્યું કે, અમદાવાદમાં કેટલાક રિક્ષાચાલક યુનિયનો દ્વારા હડતાળની જાહેરાત કરી છે તેમાં ગુજરાત ફેડરેશન જોડાયું નથી. રિક્ષાચાલકોની હડતાળમાં મિશ્ર પ્રતિસાદ જોવા મળ્યો છે જે અંગે જયંતિ પ્રજાપતિએ કહ્યું છે કે, હડતાળ એક માત્ર રસ્તો નથી, રિક્ષા ચાલુ રાખીને પણ સીએનજીના ભાવમાં ઘટાડો કરવાની માંગ કરી શકાય છે.

Source link