અમદાવાદઃ હું તો ગાંધીનગરમાં ટીચર છું કહીને વેપારીને હોટલમાં લઈ ગઈ અને ના થવાનું થયું

 

અમદાવાદઃ આજકાલ સરળતાથી રૂપિયાવાળા બની જવા માટેના અનેક કિસ્સા બની રહ્યા છે. આવો જ એક કિસ્સો અમદાવાદ શહેરમાં બન્યો છે કે જ્યાં જ્વેલર્સના વેપારી યુવતીથી આકર્ષાયા બાદ છેતરાયા છે. પોતાની ઈજ્જત ના બગડે એ માટે વપારીએ શરુઆતમાં રૂપિયા આપવાનું ચાલુ રાખ્યું પરંતુ પાછળથી તેમને ખ્યાલ આવ્યો કે તેઓ વધારેને વધારે ફસાઈ રહ્યા છે. તેમણે પોતાની સાથે બનેલી હની ટ્રેપની ઘટના ઘટના અંગે પોલીસને જાણ કરતા ત્રણ જણાની ધરપકડ કરી લીધી છે. પોતે શિક્ષિકા હોવાનું કહીને વેપારી સાથે પ્રેમ સંબંધ બાંધ્યા અને તેમને હોટલમાં લઈ જઈને શારીરિક સંબંધ બાંધ્યા હતા. આ પછી વેપારીનો વીડિયો વાયરલ કરી દેવાની ધમકી આપીને તેમને ડરાવીને રૂપિયા પડાવવાનું શરુ કરવામાં આવ્યું હતું.

કઠવાડા પાસે જ્વેલર્સની દુકાન ધરાવતા વેપારી મનસુખભાઈ (નામ છૂપાવ્યું છે) નરોડામાં પત્ની અને બાળકો સાથે રહે છે. એક વર્ષ પહેલા જ્યારે તેઓ પોતાની દુકાન પર હાજર હતા ત્યારે એક દુકાનમાં એક યુવતી આવી અને તેણે પોતાનું નામ અંજલી હોવાનું જણાવ્યું હતું. તે ગાંધીનગરમાં રહેતી હોવાનું કહીને લીટલ ચાઈલ્ડ્સ સ્કૂલમાં શિક્ષિકા હોવાનું જણાવ્યું હતું. આ સાથે તેણે રૂપિયાની જરુર હોવાનું કહીને પોતાની કાનની કડીઓ ગીરવે મૂકી હતી. આ પછી બીજા મહિને તે ફરી મનસુખભાઈની દુકાને આવી હતી અને તેણે ફરી રૂપિયાની જરુર હોવાનું કહીને 7 હજાર રૂપિયા લીધા હતા. આ પછી અંજલીએ મનસુખભાઈને પોતાની જાળમાં ફસાવવાના પેંતરા શરુ કર્યા હતા, જોકે, મનસુખભાઈને ખબર નહોતી કે તેઓ આગામી સમયમાં મોટી મુશ્કેલીમાં મુકાવાના છે.

અંજલીએ રોજ મનસુખભાઈ સાથે ફોન પર વાતો કરવાનું શરુ કર્યું હતું. આ સાથે તેણે મનસુખભાઈ પાસેથી ટૂકડે-ટૂકડે રૂપિયા પડાવવાનું પણ શરુ કરી દીધું હતું. આ પછી પોતે પ્રેગનેન્ટ હોવાનું કહીને અંજલીએ મનસુખભાઈ પાસેથી રૂપિયા 50 હજાર પડાવી લીધા હતા. આ પછી પણ તેમને લગ્ન કરી લેવાનું કહીને જો આમ ના કર્યું તો અંતિમ પગલું ભરીશ તેવી ધમકીઓ પણ આપતી હતી.

એક દિવસ અંજલી વેપારીને હોટલમાં લઈ ગઈ અને..

એક દિવસ અંજલી મનસુખભાઈને એક હોટલમાં લઈ ગઈ અને પછી ત્યાં જઈને તેમની સાથે શારીરિક સંબંધો બાંધ્યા હતા. મનસુખભાઈને એમ કે તેમના અને અંજલી સિવાય આ વાત કોઈ જાણતું નથી. પરંતુ તેમની આખી કામલીલાનો વીડિયો અંજલીએ ચોરી છુપકે ઉતારી લીધો હતો તે વાતથી તેઓ અજાણ હતા. અંજલીએ મનસુખભાઈનો હોટલમાં આખો વિડીયો ઉતારી લીધો હતો. આ પછી તેમને અંજલીના બે મિત્રોના ફોન આવવાના શરુ થયા હતા. જેમાં તેમને ધમકી આપવામાં આવતી હતી કે જો રૂપિયા નહીં આપે તો ફોટો અને વિડીયો સોશિયલ મીડિયા પર વાયરલ કરી દઈશું. આ પછી આ ટુકડીએ તેમને છેતરીને તેમની પાસેથી રૂપિયા 9.55 લાખ પડાવી લીધા હતા. જોકે, તેઓ પોતાની ઈજ્જત બચાવવામાં વધારેને વધારે ફસાતા જતા હતા આખરે તેમણે પોલીસની મદદ લીધી હતી.

મનસુખભાઈએ અંજલી સહિત તેના બે સાગરિતો સામે પોલીસ ફરિયાદ નોંધાવી હતી. પોલીસે આ મામલે તપાસ કરીને અંજલી, શહેબાઝ અને ઈકરારને ઝડપી લઈને કાર્યવાહી હાથ ધરી છે. પોલીસ દ્વારા એ પણ તપાસ કરવામાં આવશે કે આ ટૂકડી દ્વારા અગાઉ કોઈની સાથે આ રીતે છેતરપિંડી કરવામાં આવી છે કે નહીં.

Source link