અદાણી CNGના ભાવમાં 2 રૂપિયાનો વધારો ઝીંકાયો, પ્રતિ કિલો ગેસ ₹80ને પાર

 

અમદાવાદઃ મોંઘવાનો સતત માર સહન કરતી પ્રજા પર વધુ એક મોંઘવારીનો માર પડ્યો છે. આ વખતે અદાણી સીએનજી ગેસમાં 2 રૂપિયાનો વધારો કરવામાં આવ્યો છે. રોજ પેટ્રોલ અને ગેસના ભાવમાં વારાફરથી વધારો થતા પ્રજા ત્રાહિમામ પોકારી રહી છે. ગેસના ભાવમાં વધારો થતા એક કિલો ગેસની કિંમત 80ને પાર થઈ ગઈ છે. પેટ્રોલ-ડીઝલ અને ગેસના ભાવ જાણે રેસમાં ઉતર્યા હોય તેવી સ્થિતિ સર્જાઈ છે. સાત દિવસની અંદર સીએનજી ગેસના ભાવમાં 7 રૂપિયાનો વધારો ઝીંકવામાં આવ્યો છે. મોંઘવારીના સતત પડતા ડામ પર બ્રેક મારવામાં આવે તેવી માંગ પ્રજા દ્વારા કરવામાં આવી રહી છે. ગેસના ભાવમાં વધારો થવાથી રિક્ષા ચાલકો પણ મિનિમમ ભાડામાં વધારો કરવાની માંગ કરી રહ્યા છે.

મહત્વનું છે કે 1 એપ્રિલના રોજ સીએનજી ગેસમાં પ્રતિ કિલો 5 રૂપિયાનો વધારો કરવામાં આવ્યો હતો જે બાદ રિપોર્ટ્સ મુજબ આજે વધુ 2 રૂપાનો વધારો કરવામાં આવ્યો છે. આ વધારા સાથે પ્રતિ કિલો સીએનજી ગેસની કિંમત 81.59 રૂપિયા પહોંચી ગઈ છે. પેટ્રોલના ભાવ 100ને પાર થઈ ગયા બાદ હવે ગેસના ભાવ 80ને પાર કરી ગયો છે.

ગેસ અને પેટ્રોલ-ડીઝલ જીવન જરુરિયાતનો ભાવ બની ગયા છે ત્યારે આ ભાવ વધારાના લીધે અન્ય ચીજ વસ્તુઓના ભાવમાં પણ વધારો ઝીંકાઈ રહ્યો છે. તાજેતરમાં ગુજરાત ગેસ દ્વારા પણ 6.45 રૂપિયાનો વધારો કરવામાં આવ્યો હતો. જેની સાાથે ગુજરાત ગેસ પ્રતિ કિલોનો ભાવ 76.98 રૂપિયા થઈ ગયો હતો.

અમદાવાદના રિક્ષાચાલકો દ્વારા ગેસના ભાવમાં સતત વધારો થતો હોવાથી મિનિમમ ભાડામાં વધારો કરવાની માંગ કરવામાં આવી રહી છે. રિક્ષાચાલક એસોસિએશન દ્વારા મિનિમમ રિક્ષાભાડું 18 રૂપિયાથી વધારીને 30 કરવાની માંગ કરવામાં આવી રહી છે. જેમાં એસોસિએશન દ્વારા રાજ્યના મુખ્યમંત્રી ભૂપેન્દ્ર પટેલ સહિત અન્ય મંત્રીઓને રજૂઆત કરી છે.

Source link