અંકલેશ્વરમાં બોગસ માર્કશીટ-બનાવટી ચલણી નોટો બનાવતા 2 ભેજાબાઝ ઝડપાયા

 

અંકલેશ્વરઃ ભરૂચ જિલ્લાના અંકલેશ્વરમાંથી બોગસ માર્કશીટ (Bogus marksheet)અને બનાવટી ચલણી નોટો (Duplicate currency) બનાવવાનો પોલીસે પર્દાફાશ કર્યો છે. અંકલેશ્વરના ઓમકાર-2 કોમ્પલેક્સ અને અંદાડામાંથી બોગસ માર્કશીટ અને બનાવટી ચલણી નોટો છપવાના કૌભાંડનો પર્દાફાશ કરીને પોલીસે બે ભેજાબાઝોને ઝડપી પાડ્યા છે. SOG પોલીસે દરોડા પાડીને અહીંથી બે કમ્પ્યુટર, 2 પ્રિન્ટર, સ્કેનર, 239 નાપાસ વિદ્યાર્થીઓને પાસ કરેલી બોગસ માર્કશીટ અને 43 ઓરિજનલ માર્કશીટ કબજે કરી છે. આ સિવાય પોલીસે રૂપિયા 50 અને 100ના દરની બનાવટી 48 ચલણી નોટો પણ nકબજે કરી છે. જો કે, પોલીસે આ મામલે ગુનો નોંધીને બે ભેજાબાઝોને ઝડપી પાડીને આગળની કાર્યવાહી હાથ ધરી છે.

પોલીસ સૂત્રના જણાવ્યા મુજબ, ભરૂચ SOGને અંકલેશ્વરમાં બોગસ માર્કશીટ અને બનાવટી ચલણી નોટોનું રેકેટ ચાલતુ હોવાની બાતમી મળી હતી. બાતમીના આધારે ભરૂચ SOGએ ઓમકાર-2 કોમ્પલેક્સમાં દરોડા પાડ્યા હતા. દરોડામાં સામે આવ્યું કે હાંસોટની રામનગર સોસાયટીમાં રહેતો સચીન ખારવા આરતી કન્સલ્ટન્સીના ઓથા હેઠળ જોબ પ્લેસમેન્ટના નામે બોગસ માર્કશીટનું રેકેટ ચલાવતો હતો. પોલીસે સચીનને ઝડપી પાડીને વધુ પૂછપરછ હાથ ધરી હતી. પોલીસ પૂછપરછમાં સચીન ખારવાએ કબૂલ્યું કે, અંદાડાની હરિઓમ રેસીડેન્સીમાં રહેતો રાહુલ પરમાર નામનો શખ્સ તેને આ માર્કશીટ આપતો હતો. એ પછી SOGની ટીમે રાહુલ પરમારના ઘરે દરોડા પાડ્યા હતા. જ્યાંથી પોલીસની ટીમને ધોરણ 10 અને 12ની માર્કશીટ, વિવિધ કૉલેજ, વીર નર્મદ યુનિવર્સિટી, આઈટીઆઈની માર્કશીટ તથા સ્કૂલ લિવિંગ સર્ટિફિકેટ, બોનોફાઈડ સહિતના વિવિધ પ્રમાણપત્રો મળી આવ્યા હતા.

SOGની ટીમે બંને આરોપીઓ પાસેથી કમ્પ્યુટર, પ્રિન્ટર, સ્કેનર, મોબાઈલ, 404 હોલમાર્ક સ્ટીકર્સ, 239 નકલી માર્કશીટ અને 43 અસલી માર્કશીટ કબજે કરી હતી. પોલીસે ભેજાબાઝ રાહુલ પાસેથી રૂપિયા 50 અને 100ના દરની 48 છાપેલી નકલી નોટો પણ કબજે કરી હતી. આ બંને ભેજાબાઝ નાપાસ થયેલા વિદ્યાર્થીઓને નિશાન બનાવતા હતા. પાસ થયાનું પ્રમાણપત્ર આપવા માટે વિદ્યાર્થી દીઠ રૂપિયા 25,000 વસૂલતા હતા. એટલું જ નહીં નાપાસ થયેલા વિદ્યાર્થીઓને શોધી આપવા માટે રાહુલ પરમાર સચીન ખારવાને પાંચ હજાર રૂપિયા આપતો હતો.

એ પછી બોર્ડ, યુનિવર્સિટીની વેબસાઈટ પરથી લોગો, માર્કશીટના નમૂના સ્કેન કરીને સમગ્ર રેકેટ ચલાવવામાં આવતું હતું. બંને બેજાબાઝ નાપાસ થયેલા વિદ્યાર્થીઓની અસલી માર્કશીટ મેળવી બોગસ માર્કશીટ બનાવી આપતા હતા. બંને આરોપીઓ પાસેથી મોટી સંખ્યામાં માર્કશીટ, પ્રમાણપત્ર, લીવિંગ સર્ટિફિકેટ, બોનોફાઈડ સર્ટિફિકેટ મળી આવતા પોલીસને આશંકા છે તેઓએ લાખો રૂપિયાનું કૌભાંડ આચર્યુ હશે. તો SOG પોલીસે બંને આરોપીઓ પાસેથી વિવિઘ મુદ્દામાલ કબજે કરીને અંકલેશ્વર પોલીસ સ્ટેશનમાં ફરિયાદ નોંધાવી છે. પોલીસે આ મામલે આગળની કાર્યવાહી હાથ ધરી છે.

Source link